საზოგადოება

ტექნიკური ინსპექტირების გაუვლელობის გამო, თბილისში 200-მდე მიკროავტობუსი და 100-მდე ავტობუსი გაჩერებულია

18.10.18 14:00


დედაქალაქში მოძრავი საზოგადოებრივი ტრანსპორტის 300-მდე ერთეული ტექნიკური ინსპექტირების გაუვლელობის გამო გაჩერებულია. როგორც დედაქალაქის მერიის ტრანსპორტის საქალაქო სამსახურის უფროსმა მამუკა მუმლაძემ დღეს გამართულ პრესკონფერენციაზე განაცხადა, 200-მდე მიკროავტობუსი და 100-მდე ავტობუსია გაჩერებული.

„თავის დროზე, 200-მდე ავტობუსმა ხაზზე მოძრაობა შეყვიტა. ეს იყო 12-მეტრიანი ავტობუსები, რომელიც მოძველებული იყო ექსპლუატაციის კუთხით. ამის გამო ხაზები დაიჩეხა და რეალურად მიკროავტობუსებმა გადაინაწილეს ეს ხაზები. 35-მდე ხაზი აღსადგენია და ჩვენ ეს პროცესი უკვე დაწყებული გვაქვს. გვაქვს უბნები, სადაც მომსახურება მოსახლეობას არ მიეწოდება და ამ ხაზების აღდგენას დავიწყებთ. რაც შეეხება ტექდათვალიერებას, სატრანსპორტო საშუალებამ თუ ვერ გაიარა ტექდათვალიერება, ვერ დააკმაყოფილა სტანდარტი, ის ვერ იმოძრავებს ქალაქში. ჩვენ ვქმნით სისტემას, რომელსაც ფეხი უნდა აუწყონ, თუ ამ სისტემას ფეხს ვერ აუწყობენ, ჩვენ უკან დახევას არ ვაპირებთ. მიკროავტობუსების ნაწილში ვიცი, რომ 200-მდე ერთეული გაჩერებული ჰყავთ, რადგან ტესტირება ვერ გაიარა.

ავტობუსების ნაწილში 100-მდე ერთეულია გაჩერებული. მიმდინარეობს მათი ტექნიკური შემოწმება, რომ ეს ტესტირება გაიარონ. რაც შეეხება დაკვამლიანებას, ეს შესაძლოა, ბევრი მიზეზის გამო მოხდეს, ტექნიკასთან გვაქვს საქმე. შესაძლოა მუშაობის პროცესში გამოვიდეს ავტომობილი წყობიდან",- განაცხადა მუმლაძემ.

მისივე ინფორმაციით, დღეს დედაქალაქში 105 ავტობუსის და 190-მდე მიკროავტობუსის ხაზია. მისივე თქმით, თბილისში 1800 მიკროავტობუსი და 540 ავტობუსი მოძრაობს.




წყარო : IPN /www.interpressnews.ge/

წაკითხულია : 199


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები