საზოგადოება

უძველესი ქართული სოფლის აღდგენა 2020 წელს დაიწყება

16.08.19 11:15


ხევსურეთში, არხოტის ხეობაში, საქართველო-რუსეთის საზღვართან მდებარე სოფელ ამღის რეაბილიტაცია 2020 წელს დაიწყება, განაცხადა საქართველოს პრემიერ-მინისტრმა მამუკა ბახტაძემ მუცოში ყოფნის დროს.

პირიქითა ხევსურეთის ისტორიული სოფლის, ამღის გადასარჩენად გამოცემა „მთის ამბებმა“ კამპანია 24 ივლისს დაიწყო და სოფლის კომპლექსური რეაბილიტაციის მოთხოვნით პეტიცია შექმნა. პეტიციას ერთ დღეში ათასმა ადამიანმა მოაწერა ხელი, რის შემდეგაც ის საქართველოს მთავრობას წარედგინა განსახილველად.

ამღა არხოტის ხეობის ბოლო სოფელია, საქართველო-რუსეთის საზღვართან. საუკუნეების განმავლობაში ამღა ქვეყნის ერთ-ერთი ფორპოსტი იყო. ამ პატარა ისტორიულ სოფელში, სადაც მუდმივად წიკლაურების ორი ოჯახიღა ცხოვრობს, სულ 20-მდე ნაგებობაა, აქედან ექვსი კულტურული მემკვიდრეობის ძეგლია.

რაც შეეხება მუცოს, პრემიერ-მინისტრის განცხადებით, ფონდ „ქართუს“ დახმარებით იქ უკვე 16 კოშკია აღდგენილი.

„ეს იყო 5 წლიანი პროგრამა, უახლოეს მომავალში დასრულდება და მე მსურს ყველა ქართველს მოვუწოდო, რომ აუცილებლად ჩამოვიდეს მუცოში. ეს არის უნიკალური ადგილი და სიტყვებით წარმოუდგენელია ამ სილამაზის გადმოცემა. აქ გული მართლაც განსხვავებულად ძგერს. ეს არის სიამაყის საგანი მთელი საქართველოსთვის“, - განაცხადა ბახტაძემ.

პრემიერ-მინისტრმა მადლობა გადაუხადა ადგილობრივ მოსახლეობას, რომლებმაც „ყველაზე ძვირფასი, ჩვენი მთა, ჩვენი ტრადიციები, ჩვენი კულტურული ძეგლები“ შეინარჩუნეს.

„მუცო არის მაგალითი ჩვენი მრავალსაუკუნოვანი ისტორიის უწყვეტობის, რითაც თითოეული ჩვენგანი ასე ამაყობს და მე მსურს გულწრფელი მადლობა გადაგიხადოთ თითოეულ თქვენგანს“, - თქვა პრემიერმა.

პრემიერ-მინისტრის თქმით, ყველა ის მასშტაბური ინფრასტრუქტურული პროექტი, რომელიც დაწყებულია, უმოკლეს ვადებში დასრულდება.




წყარო : Sputnik საქართველო /www.sputnik-georgia.com/

წაკითხულია : 226


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები