საზოგადოება

პრეზიდენტმა დიმიტრი ბაშკიროვი ღირსების მედლით დააჯილდოვა

09.09.19 11:45


საქართველოს პრეზიდენტმა სალომე ზურაბიშვილმა, რომელიც დღეს წინანდლის კლასიკური მუსიკის საერთაშორისო ფესტივალის გახსნის ცერემონიას დაესწრო, მსოფლიოში აღიარებული პიანისტი, 88 წლის დიმიტრი ბაშკიროვი ღირსების მედლით დააჯილდოვა, ნათქვამია პრეზიდენტის ადმინისტრაციის საიტზე.

ბაშკიროვს ჯილდო საქართველოს საფორტეპიანო სკოლის დაფუძნებასა და მსოფლიო მუსიკალური ხელოვნების განვითარების საქმეში შეტანილი პირადი დიდი წვლილისა და მაღალი პროფესიონალიზმისთვის, ნაყოფიერი შემოქმედებითი, პედაგოგიური და საზოგადოებრივი საქმიანობისთვის გადაეცა.

სალომე ზურაბიშვილმა დიმიტრი ბაშკიროვს მსოფლიო მუსიკის მოვლენა უწოდა და აღნიშნა, რომ წინანდლის ფესტივალში მონაწილეობით საქართველო კიდევ ერთხელ გამოჩნდა მსოფლიოს მუსიკალურ რუკაზე.

აღსანიშნავია, რომ დიმიტრი ბაშკიროვს, რომელიც თბილისში დაიბადა 1931 წელს, 80 წლის იუბილეზე თბილისის კონსერვატორიის საპატიო პროფესორის წოდება მიენიჭა, რაც, სალომე ზურაბიშვილის თქმით, ქართული მუსიკალური წრეების მიერ პიანისტის ღვაწლის აღიარება იყო.

წინანდლის საერთაშორისო დონის კლასიკური მუსიკის ფესტივალი საქართველოს მთავრობასა და კომპანია „სილქ როუდ ჯგუფის“ წარმატებული თანამშრომლობის შედეგად დაარსდა. მისი დამფუძნებლები არიან: ვერბიეს ფესტივალის დამფუძნებელი მარტინ ენგსტრომი, ისრაელის ფილარმონიის ხელმძღვანელი ავი შოშანი, კომპანია „სილქ როუდ ჯგუფის“ დამფუძნებელი გიორგი რამიშვილი. ფესტივალის გენერალური დირექტორია დავით საყვარელიძე. ფესტივალი „თიბისი სტატუსის“ მხარდაჭერით ტარდება.




წყარო : Sputnik საქართველო /www.sputnik-georgia.com/

წაკითხულია : 181


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები