საზოგადოება

კახა კალაძე ვაჟა-ფშაველას გამზირზე მიმდინარე გამწვანების სამუშაოებს გაეცნო

13.09.19 17:00


ვაჟა-ფშაველას გამზირდე მიმდინარე გამწვანების სამუშაოებს თბილისის მერი კახა კალაძე, მოადგილესთან მაია ბითაძესთან ერთად გაეცნო. არსებულ სივრცეში 150 ძირამდე აღმოსავლური ჭადარი, ლიქვიდამბარი და არღავანი ირგვება.

ადგილზე უკვე მოწყობილია სარწყავი სისტემა. დედაქალაქის მერის თქმით, ახლადგამწვანებული ზოლი მეტროს შახტის ადგილზე მოეწყო და ვაჟა-ფშაველას სკვერს აგრძელებს.

„იქ, სადაც ახლა ავტომობილები გადაადგილდება, წლების განმავლობაში შეუძლებელი იყო მოძრაობა, რადგან განთავსებული იყო მეტროს გამნიავებელი შახტი. ავტომობილებს ამ კონკრეტული მონაკვეთისთვის გვერდის ავლა უწევდათ და გზა ფიზიკურად არ არსებობდა.

ჩვენ ყველაფერი მოვაწესრიგეთ, შახტიც შევინარჩუნეთ და გადმოტანილია გამწვანებული ზოლის ცენტრალურ ნაწილში. ამ მონაკვეთზე, რომელიც, ფაქტობრივად, გაგრძელებაა ვაჟა-ფშაველას ლამაზი, გრძელი სკვერის, მიმდინარეობს ხე-მცენარეეების რგვა, გაზონის მოწყობა.

უახლოეს დღეებში ბილიკის მოწყობის სამუშაოები ჩატარდება და კიდევ ერთი კეთილმოწყობილი სივრცე შეემატება ქალაქს“, - განაცხადა კახა კალაძემ.

მერის მოადგილის, მაია ბითაძის განცხადებით, ადგილზე სამი სხვადასხვა ჯიშის ხე ირგვება.

„დღეს ირგვება 150 ძირი ხე. ძალიან მალე ვაჟა-ფშაველას კვარტლებს და გამზირს ექნება ისეთი გამწვანებული ტერიტორია, რომელიც დამატებით ღირებულებას შესძენს მთელ ამ უბანს. ირგვება სამი ჯიშის ხე, მათ შორის, 6-მეტრიანი ჭადრები. ვფიქრობ, ეს პროექტი უნიკალური იქნება იმ ხეივნის გაგრძელების თვალსაზრისით, რომელიც ვაჟა-ფშაველას გამზირზე იყო“, - განაცხადა მაია ბითაძემ.

ადგილზე ასევე იმყოფებოდნენ მერიის გარემოს დაცვის საქალაქო სამსახურის უფროსი გიგა გიგაშვილი, ვაკის რაიონის გამგებელი ნოდარ ტურძელაძე და კომპანია „გრინსერვისის“ წარმომადგენლები.





წყარო : /www .pia.ge/

წაკითხულია : 343


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები