საზოგადოება

თეა წულუკიანი: შეწყალებისას მნიშვნელოვანია, გათვალისწინებული იყოს სოციალური რისკები

31.10.19 13:20


“ჩვენი პოზიციები და მოსაზრებები საქართველოს პრეზიდენტს გავუზიარეთ. საქართველოს პრეზიდენტის კონსტიტუციური უფლებაა შეწყალება და რა ტიპის აქტს გამოსცემს, რას გაიზიარებს და რას არა, ეს რა თქმა უნდა ჩვენ წინასწარ ვერ გვეცოდინება”, – ამის შესახებ საქართველოს იუსტიციის მინისტრმა, თეა წულუკიანმა განაცხადა.

როგორც მან აღნიშნა, გუშინ გამართულ შეხვედრაზე, პრეზიდენტთან და პარლამენტის თავმჯდომარესთან ერთან აღნიშნული საკითხი დეტალურად განიხილეს.

„ჩვენთვის ძალიან მნიშვნელოვანი იყო, რომ როდესაც პრეზიდენტმა პარლამენტს გადაუგზავნა თავისი ბრძანებულების პროექტი, ეს პროექტი და პრეზიდენტის თხოვნა, რომ შეგვესწავლა ეს პროექტი, დიდხანს უპასუხოდ არ დარჩენილიყო. სწორედ ამიტომაც ჩვენ გვქონდა შესაძლებლობა, საქართველოს პრეზიდენტისთვის, როგორც საკანონმდებლო, ასევე აღმასრულებელი ხელისუფლებების პოზიციები და მოსაზრებები პირისპირ, პირადად გაგვეზიარებინა. გვეთქვა, მაგალითად ის, რომ ჩვენ მომავალში ვერ მივემხრობით დევნილი პირის შეწყალებას, რადგან რაც არ უნდა უსამართლოდ ვთვლიდეთ, რომ პირი არის ძებნილი, მნიშვნელოვანია, იმ პირებს, ვინც მართლმსაჯულების წინაშე წარდგნენ და სასჯელს იხდიან საპატიმროში, არ გაუჩნდეთ განცდა, რომ თავი რომ აერიდებინათ მართლმსაჯულებისთვის, უკეთესი იქნებოდა. ასევე, ჩვენ მას გავუზიარეთ ის, რომ შეწყალებისას მნიშვნელოვანია, მხედველობაში იქნას მიღებული მომავალი რისკები ანუ სოციალური რისკი, როდესაც პირი დატოვებს საპატიმროს, რამხელაა, რა ხარისხისაა რეციდივის რისკი და საზოგადოებისთვის საფრთხე თავიდან ხომ არ შეიქმნება. ამას, რა თქმა უნდა, არაპროფესიონალი ადამიანები ვერ შეაფასებენ. ის პროფესიონალებმა, სოცმუშაკებმა, ფსიქოლოგებმა, ფსიქიატრებმა უნდა შეაფასონ. ასევე, ჩვენ ვუთხარით, რომ მნიშვნელოვანია შეწყალებისას, მაგალითად, ისეთი პატიმრების ინტერესების მხედველობაში მიღება, რომლებსაც უმძიმესი ჯანმრთელობის მდგომარეობა აქვთ, არ ეხებათ ეგრეთწოდებული უდო. როგორც არჩილ თალაკვაძემ უთხრა პრეზიდენტს, ასეთ შემთხვევებში ჩვენ ვთვლით, რომ პატიმრობა არის შეუსაბამო ჯანმრთელობის მდგომარეობასთან. ახლა ველოდებით აქტის გამოცემას პრეზიდენტის მხრიდან და შემდეგ პატიმრებს, რა თქმა უნდა, მიეცემათ უკვე ნათელი ხედვა იმისა, ვის რისი უფლება აქვს“, – განაცხადა თეა წულუკიანმა.
​
​ცნობისათვის, საქართველოს პრეზიდენტი სალომე ზურაბიშვილი გუშინ საქართველოს პარლამენტის თავმჯდომარეს, არჩილ თალაკვაძეს და ვიცე-პრემიერსა და იუსტიციის მინისტრს, თეა წულუკიანს შეხვდა. სალომე ზურაბიშვილმა „შეწყალების წესის შესახებ“ ბრძანებულების პროექტთან დაკავშირებით იუსტიციის მინისტრისა და პარლამენტის თავმჯდომარის მოსაზრებები მოისმინა. როგორც შეხვედრის დასრულების შემდეგ პრეზიდენტმა განაცხადა, ადმინისტრაციაში “შეწყალების წესის შესახებ” პრეზიდენტის ბრძანებულების პროექტი შემუშავდა, რომელიც შესაბამისი რეკომენდაციებისათვის საქართველოს პარლამენტს გადაეგზავნა.





წყარო : /www.kvira.ge/

წაკითხულია : 190


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები