პოლიტიკა

ბათუმში საქართველოს თავდაცვისა და უსაფრთხოების კონფერენცია დასრულდა

07.11.19 13:00


ბათუმში საქართველოს თავდაცვისა და უსაფრთხოების კონფერენცია დასრულდა. 6-7 ნოემბერს, საქართველოს თავდაცვის სამინისტრო "საქართველოს თავდაცვის და უსაფრთხოების კონფერენციას (GDSC) მასპინძლობდა. 6 ნოემბერს საერთაშორისო კონფერენცია საქართველოს პრეზიდენტმა სალომე ზურაბიშვილმა გახსნა, მონაწილეებს სიტყვით მიმართეს საქართველოს პარლამენტის თავმჯდომარემ, არჩილ თალაკვაძემ და თავდაცვის მინისტრმა, ირაკლი ღარიბაშვილმა. მოწვეული სტუმრის სტატუსით სიტყვით გამოვიდა ამერიკელი კონგრესმენი ადამ კინზინგერი, ხოლო მთავარი მომხსენებელი იყო ევროპაში აშშ-ის არმიის მეთაური გენერალ-ლეიტენანტი კრისტოფერ კავოლი.

კონფერენციაზე თავდაცვისა და უსაფრთხოების აქტუალური საკითხები განიხილეს. კონფერენცია, რომელიც წელს რიგით მეცამეტე იყო, გადაწყვეტილების მიმღებ პირებს, ექსპერტებსა და აკადემიური წრეების წარმომადგენლებს მასპინძლობდა, რომლებიც ინტერაქციული სესიებისა და ღია დისკუსიების ფორმატში ერთმანეთს საქართველოს, შავი ზღვის რეგიონის, ევროატლანტიკური უსაფრთხოებისა და დღევანდელი საერთაშორისო წესრიგის წინაშე გამოწვევების შესახებ საკუთარ მოსაზრებებსა და ხედვებს უზიარებდნენ.

2019 წლის კონფერენცია ოთხ პანელურ სესიას მოიცავდა. 6 ნოემბერს, პანელები შეეხებოდა შავი ზღვის რეგიონში უსაფრთხოების გარემოს განვითარებას, ასევე, საქართველოს არჩეულ საგარეო კურსს და ბოლოს, ჰიბრიდულ ტაქტიკასა და ჰიბრიდულ საფრთხეებს.

7 ნოემბერს, პანელური დისკუსია "საქართველოს სტრატეგიულ მომზადება: სიტყვებიდან ქმედებამდე" იყო.




წყარო : IPN /www.interpressnews.ge/

წაკითხულია : 280


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები