ეკონომიკა

ნათია თურნავა: ჩვენთვის სტრატეგიულად მნიშვნელოვანია ყურის ქვეყნებიდან ინვესტიციების მოზიდვა

02.03.20 15:00


„ჩვენ აქტიურად ვმუშაობთ ახალი ინვესტიციებისა და ინვესტორების მოზიდვაზე. ჩვენთვის სტრატეგიულად მნიშვნელოვანია მოვიზიდოთ ინვესტიციები ყურის ქვეყნებიდან".

ამის შესახებ ეკონომიკისა და მდგრადი განვითარების მინისტრმა ნათია თურნავამ ყატარში ოფიციალური ვიზიტის დროს განაცხადა.

დელეგაციაში, რომელსაც მინისტრი ხელმძღვანელობს, ასევე შედიან ეკონომიკისა და მდგრადი განვითარების მინისტრის მოადგილე გენადი არველაძე და სააგენტოს „აწარმოე საქართველოში“ დირექტორი მიხეილ ხიდურელი.

ვიზიტის ფარგლებში, საქართველოს დელეგაცია უკვე შეხვდა ყატარის კომერციისა და ინდუსტრიის მინისტრს ალი ბინ აჰმედ ალ კუვარის, ასევე ყატარის ბიზნესმენთა ასოციაციის თავმჯდომარეს, შეიხ ფაისალ ბინ ქასიმ ალ თანისს და ადგილობრივი ბიზნესის წარმომადგენლებს.

„შეხვედრებზე გამოიხატა მაღალი ინტერესი საქართველოს მიმართ. ყატარიდან ზოგიერთს უკვე დაწყებული აქვს პროექტი საქართველოში, მაგრამ ორმხრივი თანამშრომლობის პოტენციალი გაცილებით დიდია.

ინვესტორებს აინტერესებთ საქართველოში შემოსვლა - ისინი ხედავენ პოტენციალს სამშენებლო სექტორში, სასტუმროების ინდუსტრიასა და სხვა სექტორებში. გარდა ამისა, მათ დიდი ინტერესი აქვთ, მონაწილეობა მიიღონ საქართველოს შავი ზღვის აკვატორიის საპორტო - სატერმინალო ინფრასტრუქტურის განვითარების პროცესში. საქართველო არის აბრეშუმის გზის ნაწილი და ყატარსაც სურვილი აქვს, ამ პროცესში მიიღოს აქტიური მონაწილეობა“, - განაცხადა ნათია თურნავამ.

მისი თქმით, შეხვედრებზე გამოითქვა ძალიან ბევრი საერთო ინტერესი.

„მე ძალიან პოზიტიურად განვეწყვე და ვფიქრობ, რომ მნიშვნელოვანი ინვესტიციები წამოვა ყატარიდან,“ - აღნიშნა ეკონომიკის მინისტრმა.

საქართველოს დელეგაცია ვიზიტის ფარგლებში ასევე შეხვედრას გამართავს ყატარის ენერგეტიკის საქმეთა სახელმწიფო მინისტრს და კორპორაცია „Qatar Petroleum“ - ის აღმასრულებელ დირექტორთან, საად შერიდა ალ კააბისთან, ტრანსპორტისა და კომუნიკაციების მინისტრთან იასიმ სეიფ აჰმედ ალ სულაითისთან, აგრეთვე „Qatar Mining“ - ის აღმასრულებელ დირექტორთან ჰალიდ ალ ობაიდლისთან და ადგილობრივი საქმიანი წრეების წარმომადგენლებთან.




წყარო : /www .pia.ge/

წაკითხულია : 235


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები