პოლიტიკა

გრძელდება სამართლებრივი პროცესის პოლიტიზირება — კუბილიუსი რურუაზე

31.07.20 12:00


ევროპარლამენტარი და ლიეტუვის ყოფილი პრემიერ-მინისტრი, ანდრიუს კუბილიუსი „მთავარი არხის“ მეწილის, გიორგი რურუასთვის გამამტყუნებელი განაჩენის გამოტანას გამოეხმაურა და განაცხადა, რომ „სამართლის პოლიტიზირება გრძელდება“.

„სახელმწიფო მდივანმა მაიკ პომპეომ გაართხილა [ხელისუფლება] სასამართლო და საარჩევნო პროცესების პოლიტიზირების შესახებ. მაგრამ სამართლის პოლიტიზირება გრძელდება: ოპოზიციური ტელეარხის ინვესტორს დღეს [გამამტყუნებელი] განაჩენი გამოუტანეს. ჩაერევა საქართველოს პრეზიდენტი საქმეში და დაიცავს 8 მარტის შეთანხმების სულისკვეთებას?“, — დაწერა მან „ტვიტერზე“.

აქამდე, რურუას გათავისუფლებისკენ პრეზიდენტ ზურაბიშვილს ევროპარლამენტარმა ანა ფოტიგამ მოუწოდა.

თბილისის საქალაქო სასამართლომ გიორგი რურუა დღეს, 30 ივლისს, დამნაშვედ ცნო წარდგენილ ბრალდებაში და სასჯელის სახით შეუფარდა თავისუფლების აღკვეთა 4 წლის ვადით. გადაწყვეტილება მოსამართლე ვალერიან ბუგიანიშვილმა დღეს, 30 ივლისს გამოაცხადა.

„მთავარი არხის“ ერთ-ერთი დამფუძნებელი და მეწილე გიორგი რურუა, რომელიც 2019 წელს რუსთაველის გამზირზე მიმდინარე აქციებში იყო ჩართული, 2019 წლის 18 ნოემბერს დააკავეს. მას ბრალი სისხლის სამართლის კოდექსის 236-ე მუხლის მე-3 და მე-4 მუხლების მიხედვით წაუყენეს, რაც ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.

თავად რურუა ბრალს იარაღის უკანონოდ ტარების შესახებ არ აღიარებს და თავს პოლიტპატიმრად მიიჩნევს. ნოემბერში სასამართლოზე რურუამ განაცხადა, რომ სამართალდამცველებმა ადვოკატთან დარეკვის უფლება არ მისცეს, ნების წინააღმდეგ გაჩხრიკეს, ნების საწინააღმდეგოდ აუღეს დნმ-ის ნიმუში და იარაღი ჩაუდეს.

საქართველოს პროკურატურამ 2019 წლის 25 დეკემბერს განაცხადა, რომ გიორგი რურუას დაუმატეს ახალი ბრალდება — სასამართლო გადაწყვეტილების შეუსრულებლობა და მისი შესრულებისათვის ხელის შეშლა (სისხლის სამართლის კოდექსის 381-ე მუხლის პირველი ნაწილით გათვალისწინებული ქმედება).

გიორგი რურუა თავს პოლიტიკურ პატიმრად მიიჩნევს. მას პოლიტიკურ პატიმრად მიიჩნევენ ოპოზიციური პარტიებიც, მათ შორის, ენმ და ევროპული საქართველო. იმის გამო, რომ გიორგი რურუა ამ დრომდე არ იყო გათავისუფლებული პატიმრობიდან, აღნიშნულმა პარტიებმა მონაწილეობა არ მიიღეს საკონსტიტუტციო ცვლილებების დამტკიცებაში, რომლის მიხედვითაც, 2020 წლის საპარლამენტო არჩევნები პროპორციულთან მიახლოებული სისტემით, 120/30 პროპორციით უნდა ჩატარდეს.




წყარო : /www. netgazeti.ge/

წაკითხულია : 262


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები