ეკონომიკა

ნათია თურნავა - პანდემიის მიუხედავად, 2021 წლის იანვარ-მარტში საქართველოს ექსპორტი გერმანიაში 40 პროცენტით გაიზარდა

11.05.21 13:00


ეკონომიკისა და მდგრადი განვითარების მინისტრმა, ნათია თურნავამ მონაწილეობა მიიღო გერმანიაში საქართველოს საელჩოს ინიციატივითა და გერმანიის დარგობრივი უწყებების მხარდაჭერით ჩამოყალიბებული ფორმატის – „ქართულ-გერმანული ბიზნესდიალოგის“ ფარგლებში ჩატარებულ რიგით მეორე ონლაინშეხვედრაში.

 

„საქართველო-გერმანიის ეკონომიკური ურთიერთობები მუდმივად ვითარდება.

პანდემიის მიუხედავად, 2021 წლის იანვარ-მარტში საქართველოს ექსპორტი გერმანიაში 40 პროცენტით გაიზარდა. აქტიურად მიმდინარეობს ორი ქვეყნის კერძო სექტორის თანამშრომლობა. საქართველოში დღეს 1 000-ზე მეტი კომპანია მოქმედებს, სადაც გერმანული კაპიტალი მონაწილეობს. ამის მიუხედავად, განვითარების რესურსი ბევრად მეტია“, – აღნიშნა მინისტრმა შეხვედრის დასრულების შემდეგ.

 

„ქართულ-გერმანული ბიზნესდიალოგის“ ფარგლებში გამართულ შეხვედრაზე სიტყვით გამოსვლისას, ნათია თურნავამ გერმანელ კოლეგასთან ერთად გლობალური პანდემიის ფონზე საქართველო-გერმანიის სავაჭრო-ეკონომიკური ურთიერთობები განიხილა და ყურადღება გამახვილდა ნაბიჯებზე, რომელიც აუცილებლად უნდა გადაიდგას. მისი თქმით, პანდემიამ მნიშვნელოვანი ზიანი მიაყენა საქართველოს ეკონომიკას და შემოაბრუნა ის პოზიტიური ტენდენციები, რაც პანდემიამდე ფიქსირდებოდა ეკონომიკის ყველა მიმართულებით.

 

მინისტრმა განსაკუთრებული აქცენტი ტურიზმის სექტორზე გააკეთა. მისი თქმით, საქართველო მსოფლიოს უდიდესი ტურისტული გამოფენის ITB Berlin 2023-ის ოფიციალური მასპინძელი ქვეყანაა, რაც ხელს შეუწყობს მთელს მსოფლიოში, მათ შორის, გერმანიაში საქართველოს, როგორც ტურისტული მიმართულების, პოპულარიზებას.

 

ონლაინშეხვედრაზე გერმანიის მხარეს წარმოადგენდა გერმანიის ეკონომიკისა და ენერგეტიკის ფედერალური მინისტრის მოადგილე თომას ბარაისი. შეხვედრაში ასევე მონაწილეობდნენ ორივე ქვეყნის დიპლომატიური მისიების ხელმძღვანელები ლევან იზორია და ჰუბერტ ქნირში, აგრეთვე სააგენტოს „აწარმოე საქართველოში“ ხელმძღვანელი მიხეილ ხიდურელი და საქართველოს სავაჭრო-პალატის პრეზიდენტი გიორგი პერტაია.

 

 

წყარო :  /www.1tv.ge/

წაკითხულია : 271


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები