პოლიტიკა

ნუგზარ წიკლაური - ქართული ჯარისადმი სააკაშვილის მოწოდება ძალიან სწორი და დროულია

13.09.21 16:20


ქართული ჯარი ყოველთვის იყო ქართული საზოგადოების პატრიოტული ელიტა, ჯარი არის აპოლიტიკური, ივანიშვილი ვერავითარ შემთხვევაში ვერ მოხერხებს ქართული ჯარის, პოლიციის და ქართული ძალოვანი სისტემების პოლიტიკური მიზნებისთვის გამოყენებას, – ამის შესახებ „ნაციონალური მოძრაობის“ წევრმა ნუგზარ წიკლაურმა განაცხადა.

 

მისივე თქმით, ყველა დიქტატურა, რომელიც  საბოლოო ჯამში მიმართავდა უხეშ ფიზიკურ ძალას, სამხედრო ძალას, მარცხით დამთავრდა.

 

„ქართული ჯარი ყოველთვის იყო ქართული საზოგადოების პტრიოტული ელიტა, დიახ, ჯარი არის აპოლიტიკური. ამიტომ ივანიშვილი ვერავითარ შემთხვევაში ვერ მოხერხებს ქართული ჯარის, პოლიციის და ქართული ძალოვანი სისტემების თავისი პოლიტიკური მიზნებისთვის გამოყენებას. რაც უფრო მეტად ეცემა ივანიშვილის რეიტინგი, მით უფრო დიდი არის მისი სურვილი, რომ როგორმე ქართველი ჯარისკაცები გამოიყენოს, რათა როგორმე შემოაბრუნოს არჩევნების ბედი. ეს არის შეუძლებელი. ყველა დიქტატურა მიმართავდა საბოლოო ჯამში უხეშ ფიზიკურ ძალას, სამხედრო ძალას, მაგრამ ყველა დიქტატურამ დაამთავრა მარცხით და ასე დაამთავრებს ივანიშვილიც“, – აღნიშნა ნუგზარ წიკლაურმა.

 

რაც შეეხება კითხვას, „რატომ გახდა საჭირო მიხეილ სააკაშვილის მხრიდან ამ მიმართვის ჩაწერა, გაქვთ ფაქტები, სადაც მთავრობა ჯარს პოლიტიკური მიზნებისთვის იყენებს?“, – ნუგზარ წიკლაური აღნიშნავს, რომ ხედავენ მთელი სახელმწიფო უწყებების პოლიტიზაციას.

 

„ვხედავთ, რომ მერობის ყველა კანდიდატი, ვინც ივანიშვილმა ახლა დააყენა, არის სუს-თან რაღაც ფორმით დაკავშირებული. ზოგიერთი მათგანი პირდაპირ ფარული მიყურადების სპეციალისტები, სწორედ ამიტომ ახლა მნიშვნელოვანია, რომ ქართულმა პოლიციამ და ჯარმა შეინარჩუნო ნეიტრალურობა. ვიცით ფაქტები, როცა ისინი ცდილობენ, როგორმე მოახდინონ ამ სისტემების პოლიტიზება და  საკუთარი პოლიტიკური მიზნებისთვის ჩაიყენონ ბრძოლაში, მაგრამ არ გამოუვათ ეს. ქართული ჯარისადმი ეს მოწოდება არის ძალიან სწორი, დროული.

 

ჩვენც მოვუწოდებთ ქართულ ჯარს, რომ იმ დიდი გამოწვევის წინაშე, რაც ახლა უდგას ქართულ სახელმწიფოს, და რაც გამოიხატება იმაში, რომ საქარათველოს ყველა მოქალაქემ ხმა უნდა მისცეს იმას, თუ როგორ წარმოუდგენია მომავალი, არც ერთი სამხედრო სტრუქტურა არ ჩაერთოს იმაში, რომ როგორმე შეცვალოს ქართველი ხალხის ნება.

 

დარწმუნებული ვარ, ვერც ქართული ჯარის და ვერც პოლიციის პოლიტიზაციას ვერ შეძლებენ, რადგან ისინიც საქართველოს მოქალაქეები არიან, კარგად ხედავენ, რომ დილემა, რომელიც ჩვენი ქვეყნის წინაშე დგას, არის ასეთი – რუსეთი ან თავისუფალი საქართველო და ამ დილემის წინაშე ყველა იქნება საქართველოს მხარეს“, – განაცხადა ნუგზარ წიკლაურმა.

 

ნუგზარ წიკლაურის თქმით, დარწმუნებულია ქართული ჯარი საქართველოს მხარდსაჭერად მისცემს ხმას.

 

„ქართულ ჯარში არიან საქართველოს მოქალაქები, მათ აქვთ თავისი რწმენა და მე დარწმუნებული ვარ, რომ ამ რწმენის შესაბამისად საქართველოს მხარდასაჭერად მისცემენ ხმას. რაც შეეხება იმას, რომ ივანიშვილს ეზიზღება ქართული ჯარი და ქართული პოლიცია, ეს არაერთხელ გამოვლენილა, თუნდაც იმ სიტყვებით, რომ საქართველომ და ქართულმა ჯარმა დაიწყო ომოიო. თუნდაც იმით, რომ ყველა სახელმწიფო სტრუქტურის დეგრადაცია მოახდინა მან 9 წლის განმავლობაში და ქართული ჯარი, როგორც მოწინავე ნაწილი ქართული საზოგადოები, კარგად გრძნობს იმას, თუ როგორი არის ივანიშვილის დამოკიდებულება მათ მიმართ. დისფუნქციური ქვეყანა არის ივანიშვილის პოლიტიკური იდეა, ხოლო ჩვენი და ქართული ჯარისკაცების მთავარი იდეა გახლავთ ძლიერი ქართული სახელმწიფო“, – განაცხადა ნუგზარ წიკლაურმა.

 

საქართველოს ყოფილმა პრეზიდენტმა, უკრაინის რეფორმების აღმასრულებელი კომიტეტის თავმჯდომარე მიხეილ სააკაშვილმა „ფეისბუქზე“ გავრცელებულ ვიდეოში განაცხადა, რომ საქართველო არის გადასარჩენი და მას სამხედრო მოსამსახურეების პატრიოტიზმის იმედი აქვს. მან ასევე მიმართა სამხედრო მოსამსახურეებს, მოემზადონ სამოქალაქო ვალის შესასრულებლად.

 

„საქართველო არის გადასარჩენი, მოგმართავთ ჩვენს საამაყო სამხედრო მოსამსახურეებს, მაგრამ პირველ რიგში, როგორც მოქალაქეებს, ყველა უნდა მოვემზადოთ სამოქალაქო ვალის შესასრულებლად არჩევნებზე აქტიურად მონაწილეობისთვის, თქვენი პატრიოტიზმის იმედი მაქვს“, – განაცხადა მიხეილ სააკაშვილმა.

 

 

 

წყარო :  /www.1tv.ge/

წაკითხულია : 91


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები