პოლიტიკა

ევროკავშირის საგარეო ქმედებათა სამსახური საქართველოს უზენაესი სასამართლოს მოსამართლეების დანიშვნასთან დაკავშირებით განცხადებას ავრცელებს

02.12.21 15:20


ევროკავშირი კიდევ ერთხელ მოუწოდებს საქართველოს ხელისუფლებას გააძლიეროს სასამართლო სისტემის დამოუკიდებლობა, ანგარიშვალდებულება და ხარისხი, მათ შორის იუსტიციის უმაღლესი საბჭოსი, ფართო, ინკლუზიური და პარტიათაშორისი რეფორმების პროცესით, – ამის შესახებ ევროკავშირის საგარეო ქმედებათა სამსახურის პრესსპიკერის განცხადებაშია ნათქვამი.

 

როგორც საქართველოს უზენაესი სასამართლოს მოსამართლეების დანიშვნასთან დაკავშირებულ განცხადებაშია აღნიშნული, ევროკავშირი რჩება სრულიად ერთგული, მხარი დაუჭიროს საქართველოს რეფორმებს ევროკავშირი-საქართველოს ასოცირების შეთანხმების შესაბამისად.

 

„ოთხშაბათს საქართველოს პარლამენტმა დაამტკიცა უვადოდ უზენაესი სასამართლოს ოთხი მოსამართლე. ასეთი დანიშვნები, რომლებიც ხორციელდება წარდგენის პროცესში არსებული ხარვეზების აღმოფხვრამდე, არ შეესაბამება ეუთო-ს დემოკრატიული ინსტიტუტებისა და ადამიანის უფლებების ოფისისა და ევროპის საბჭოს ვენეციის კომისიის რეკომენდაციებს. ბოლო დანიშვნები ეწინააღმდეგება ამბიციური სასამართლო რეფორმის ვალდებულებას, რომელიც საქართველოს ლიდერებმა აიღეს მიმდინარე წლის 19 აპრილის პოლიტიკური შეთანხმებით და 28 ივლისს დაადასტურეს. ეს მოიცავდა უზენაეს სასამართლოში წარდგენის პროცესში საკითხების აღმოფხვრას მოსამართლეების დანიშვნამდე. ეს ქმედებები სასამართლო დამოუკიდებლობისა და საქართველოს სასამართლო სისტემისადმი საზოგადოების ნდობისთვის ძირის გამოთხრის საფრთხეს ქმნის. ევროკავშირი კიდევ ერთხელ მოუწოდებს საქართველოს ხელისუფლებას გააძლიეროს სასამართლო სისტემის დამოუკიდებლობა, ანგარიშვალდებულება და ხარისხი, მათ შორის იუსტიციის უმაღლესი საბჭოსი, ფართო, ინკლუზიური და პარტიათაშორისი რეფორმების პროცესით. ევროკავშირი შეახსენებს, მიუხედავად იმისა, რომ იგი რჩება სრულიად ერთგული, მხარი დაუჭიროს საქართველოს რეფორმებს ევროკავშირი-საქართველოს ასოცირების შეთანხმების შესაბამისად, ევროკავშირის დახმარება საქართველოსთვის რჩება დამოკიდებული ძირითადი რეფორმების პროგრესზე, მათ შორის სასამართლო რეფორმის“, – ნათქვამია განცხადებაში.

 

საქართველოს პარლამენტმა უზენაესი სასამართლოს მოსამართლეობისთვის წარდგენილ ოთხივე კანდიდატს მხარი პირველ დეკემბერს დაუჭირა.

 

 

წყარო :  /www.1tv.ge/

წაკითხულია : 181


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები