ეკონომიკა

რომეო მიქაუტაძე ქვესადგურის „გარდაბანი-500“ ტერიტორიაზე განხორციელებული სარეკონსტრუქციო სამუშაოების შედეგებს გაეცნო

27.03.23 14:20


ეკონომიკისა და მდგრადი განვითარების მინისტრის პირველი მოადგილე, რომეო მიქაუტაძე ქვესადგურის „გარდაბანი-500“ ტერიტორიაზე განხორციელებული სარეკონსტრუქციო სამუშაოების შედეგებს გაეცნო.

 

სამინისროს ინფორმაციით, „გარდაბანი-500“ ქვეყნის ენერგომომარაგებისთვის საკვანძო ქვესადგურია. ზამთრის პერიოდში, როდესაც საქართველოს ჰიდროელექტროსადგურების გენერაცია იკლებს, თბოსადგურებისა და სატრანზიტო ელექტროგადამცემი ხაზების ხარჯზე, ქვესადგური საქართველოს ენერგოსისტემაში ელექტროენერგიის მოხმარების 60-70%-ს უზრუნველყოფს.

 

მასთან ერთად ქვესადგურში განხორციელებული სამუშაოები დაათვალიერეს სს „საქართველოს სახელმწიფო ელექტროსისტემის“ გენერალურმა დირექტორმა გიორგი გიგინეიშვილმა და სს „საქრუსენერგოს“ გენერალურმა დირექტორმა ბაჩანა სულაძემ.

 

მინისტრის პირველი მოადგილის განცხადებით, ქვესადგურში მასშტაბური სამუშაოების განხორციელებამ ქვესადგურის გამტარუნარიანობის ზრდას ხელი შეუწყო.

 

„პროექტის დასრულების შემდეგ, საქართველოსა და აზერბაიჯანის ენერგოსისტემებს შორის შესაძლებელი გახდება 1000 მგვტ სიმძლავრის შეუფერხებლად მიმოცვლა, როგორც ექსპორტ-იმპორტის, ასევე ტრანზიტის მიმართულებით“, - განაცხადა რომეო მიქაუტაძემ.

 

მისი თქმით, პროექტის განხორციელება, რომლის ბიუჯეტიც დაახლოებით, 20 მლნ ლარს შეადგენდა, აზერბაიჯანთან სინქრონული ოპერირების საიმედოობის ამაღლებას შეუწყობს ხელს.

 

ამასთან, მინისტრის პირველი მოადგილის განცხადებით, პროექტის დასრულება, განსაკუთრებით ზამთრის სეზონზე, მნიშვნელოვნად გაზრდის ქვეყნის სტაბილურ ელექტრომომარაგებას.

 

2022 წლის დასასრულს, განხორციელდა ქვესადგური „გარდაბანი-500“-ის სრული რეკონსტრუქცია - მოეწყო 330 და 220 კვ. ახალი უჯრედები, ექსპლუატაციაში შევიდა 400 მგვტ. სიმძლავრის, 330 კვ. მეორე ავტოტრანსფორმატორი. სამუშაოები საქართველოს გადამცემი ქსელის განვითარების ათწლიანი გეგმის მიხედვით, 330 კვ. ელექტროგადამცემი ხაზის „გარდაბანი“ გაორჯაჭვიანების პროექტის ფარგლებში მიმდინარეობდა. აღნიშნული ელექტროგადამცემი ხაზი ქვესადგურების „გარდაბანი-500“ და „აღსტაფა“ მეშვეობით ერთმანეთთან აკავშირებს საქართველოსა და აზერბაიჯანის ენერგოსისტემებს.

 

 

წყარო :  /www.imedinews.ge/

წაკითხულია : 388


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები