პოლიტიკა

მაკა ბოჭორიშვილი - ოპოზიციის ზოგიერთი წარმომადგენლისგან ვხედავთ, რომ არ მონაწილეობენ პროცესში, ცდილობენ, საქართველომ კანდიდატი ქვეყნის სტატუსი არ მიიღოს

27.03.23 17:20


ზოგადად, „ნაციონალური მოძრაობა“ ყველგან აგვიანებს, 12 პუნქტთან დაკავშირებით მუშაობა საქართველოს პარლამენტში, ფაქტობრივად, დასრულების ეტაპზეა. არაერთი შეხვედრა გაიმართა სამუშაო ჯგუფების ფორმატში, სადაც „ნაციონალური მოძრაობა“ პრინციპულად არ მონაწილეობდა, – ამის შესახებ „ქართული ოცნების“ წევრმა, მაკა ბოჭორიშვილმა განაცხადა.

 

მისი თქმით, „ნაციონალური მოძრაობის“ წევრებს შეუძლიათ, რეკომენდაციების შესრულებასთან დაკავშირებულ საკითხებში ჩაერთონ.

 

„დარჩენილ საკითხებს რაც შეეხება, რაც უკავშირდება დეოლიგარქიზაციის შესახებ კანონზე მუშაობას, ამაზე მუშაობა გაგრძელდება და თუ მიიღებენ მონაწილეობას, ამას არავინ უკრძალავს, პირიქით, „ქართული ოცნების“ მხრიდან წარმოდგენილი სამუშაო გეგმა, რომელიც პირველ ივლისს იქნა წარდგენილი, სწორედ ამას გულისხმობდა. პოლიტიკოსების გადაწყვეტილებაა, რამდენად ჩაერთვებიან ამ პროცესში“, – განაცხადა ბოჭორიშვილმა.

 

მაკა ბოჭორიშვილის განცხადებით, დეოლიგარქიზაციაზე არ არსებობდა საერთაშორისო პრაქტიკა და მხოლოდ უკრაინული კანონმდებლობის საფუძველზე მოხდა აღნიშნულ კანონპროექტზე მუშაობა.

 

„ახლა მნიშვნელოვანია, რომ ვენეციის კომისიის რეკომენდაციების შესაბამისად გავაგრძელოთ კანონპროექტზე მუშაობა. რაც შეეხება ოპოზიციას, მათი გადაწყვეტილებაა, მიიღებენ თუ არა სამუშაო პროცესში მონაწილეობას. ვხედავთ ძალიან დიდ სიჯიუტეს ოპოზიციის ზოგიერთი წარმომადგენლის მხრიდან, რომლებიც პრინციპულად არ მონაწილეობენ პროცესში და შემდგომ აზიანებენ საქართველოს ევროპულ მომავალთან დაკავშირებულ მუშაობას, მაქსიმალურად ცდილობენ, რომ საქართველომ კანდიდატი ქვეყნის სტატუსი არ მიიღოს“, – აღნიშნა ბოჭორიშვილმა.

 

ამასთან, მაკა ბოჭორიშვილმა კომენტარი გააკეთა მამუკა ხაზარაძის განცხადებაზე, მისი თქმით, „ასეთები არიან საქართველოს პარლამენტში და არამხოლოდ პარლამენტში“.

 

„ოპოზიციის წარმომადგენლებისთვის კანდიდატის სტატუსის მინიჭების საკითხი იქცა პოლიტიკურ ინსტრუმენტად, ინსტრუმენტად პოლიტიკური ბრძოლისთვის და ისინი ამაში ხედავენ ხელისუფლების ხელში ჩაგდების კარგ შანსსა და შესაძლებლობას. თუ საქართველო „ქართული ოცნების“ პირობებში არ მიიღებს კანდიდატი ქვეყნის სტატუსს, ეს მათ შესაძლებლობას მისცემს, რომ „ქართული ოცნების“ ხელისუფლება ნებისმიერი გზით შეცვალონ. თუმცა, იმის თქმა ნებისმიერი პოლიტიკოსის მხრიდან, რომ მას არ სურს კანდიდატი ქვეყნის სტატუსი ალბათ ძალიან რთულია. მათი საქმე მიმართულია, რომ საქართველომ არ მიიღოს კანდიდატი ქვეყნის სტატუსი“, – განაცხადა ბოჭორიშვილმა.

 

 

 

წყარო :  /www.1tv.ge/

წაკითხულია : 154


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები