პოლიტიკა

თინა ბოკუჩავა - ღარიბაშვილმა გუშინ მოსახლეობას უთხრა - თუ გინდათ ნატო, გინდათ ომი! - ის ღიად ეწევა ანტიდასავლურ კამპანიას, რომელიც ჩვენთვის ნატო-ს პერსპექტივის გაქრობას ემსახურება

31.05.23 13:20


ღარიბაშვილმა გუშინ მოსახლეობას უთხრა - თუ გინდათ ნატო, გინდათ ომი! - ის ღიად ეწევა ანტიდასავლურ კამპანიას, რომელიც ემსახურება ჩვენთვის ნატო-ს პერსპექტივის გაქრობას, - ამის შესახებ ჟურნალისტებთან ნაციონალური მოძრაობის" ფრაქციის თავმჯდომარე თინა ბოკუჩავამ ბიუროს სხდომის დასრულების შემდეგ განაცხადა.

 

მისი თქმით, აუცილებელია პრემიერი პარლამენტში მივიდეს დაუყოვნებლივ და არა ერთი თვის შემდეგ.

 

„პაპუაშვილს ჩვენი მხრიდან პრემიერის დაბარება მიაჩნია კაპრიზად, ასე ესმის მას ოპოზიციის ფუნქცია და ანგარიშვალდებულების ფუნქცია, რაც საპარლამენტო რესპუბლიკაში უნდა არსებობდეს. ღარიბაშვილმა გუშინდელი განცხადებით ჩვენი ქვეყნის 73 პროცენტს, რომელიც მხარს უჭერს ნატო-ში გაწევრიანებას, უთხრა, რომ თუ გინდათ ნატო, გინდათ ომი! ეს იყო არსი ამ განცხადების და ისინი ცდილობენ საზოგადოებაში პროდასავლური განწყობების შეცვლას. ასეთ მწვავე მოცემულობაში როცა პრემიერი ანტიკონსტიტუციურ, ანტისახელმწიფოებრივ, ანტიდასავლურ განცხადებებს აკეთებს, ღიად თავს ესხმის ნატო-ს იდეას, რომელიც არის მშვიდობის ალიანსი, რომელიც დასავლეთმა თავის დროზე შექმნა საბჭოთა რუსეთის წინააღმდეგ, ხოლო ჩვენი ქვეყნისთვის არის ერთადერთი უსაფრთხოების გარანტი, აუცილებლად მიგვაჩნია, რომ დაუყოვნებლივ გამოცხადდეს პრემიერი პარლამენტში და არა ერთი თვის შემდეგ, როგორც საიდუმლოდ შეთანხმდნენ ბატონი შალვა და ღარიბაშვილი, ისიც რეგლამენტის დარღვევით, რომელიც ითვალისწინებს, რომ თარიღის შეთანხმება უნდა მოხდეს ბიუროზე, რომელიც უფლებამოსილია მიიღოს აღნიშნული გადაწყვეტილებები. ამაზე მნიშვნელოვანი საკითხი არ დგას დღეს, როცა პრემიერი ღიად ეწევა ანტიდასავლურ კამპანიას, რომელიც ემსახურება ჩვენთვის ნატოს პერსპექტივის გაქრობას”, - განაცხადა ბოკუჩავამ.

 

პრემიერ-მინისტრი ყოველწლიური ანგარიშით პარლამენტის პლენარულ სხდომაზე 30 ივნისს გამოვა.

 

როგორც პარლამენტის თავმჯდომარემ შალვა პაპუაშვილმა ბიუროს სხდომაზე განაცხადა, პრემიერის პარლამენტში მოსვლის თარიღი შეთანხმებულია.

 

რეგლამენტის გათვალისწინებით, პლენარულ სხდომაზე გამოსვლამდე პრემიერი პარლამენტს ყოველწლიურ მოხსენებას წერილობითი ფორმით წარუდგენს, რაც რეგლამენტის მიხედვითვე, 1-ელ ივნისამდე უნდა მოხდეს. ამასთან დაკავშირებით პაპუაშვილმა განაცხადა, რომ ანგარიში პარლამენტისთვის დადგენილ ვადაში იქნება წარმოდგენილი.

 

 

 

წყარო  :  IPN /www.interpressnews.ge/

წაკითხულია : 208


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები