ეკონომიკა

საქართველომ, აზერბაიჯანმა, თურქეთმა და ყაზახეთმა ახალ მემორანდუმს მოაწერეს ხელი

08.12.16 20:20


აზერბაიჯანმა, ყაზახეთმა, თურქეთმა და საქართველომ სარკინიგზო გადაზიდვების სფეროში ურთიერთგაგების ახალ მემორანდუმს მოაწერეს ხელი, იუწყება სააგენტო „რია ნოვოსტი“ „აზერბაიჯანის რკინიგზის“ პრეს-სამსახურზე დაყრდნობით.

„გაიმართა აზერბაიჯანის, ყაზახეთის, თურქეთისა და საქართველოს რკინიგზის ადმინისტრაციების წარმომადგენლების შეხვედრა, რომელშიც მონაწილეობა მიიღეს „აზერბაიჯანის რკინიგზის“ თავმჯდომარემ ჯავიდ გურბანოვმა, „ყაზახეთის რკინიგზის“ ვიცე-პრეზიდენტმა კანატ ალისბაევმა, თურქეთის სახელმწიფო რკინიგზის გენერალურმა დირექტორმა ვეისი კურთმა და „საქართველოს რკინიგზის“ გენერალურმა დირექტორმა მამუკა ბახტაძემ. მხარეებმა განიხილეს ტრანსკასპიური საერთაშორისო სატრანსპორტო დერეფნის განვითარების პერსპექტივები, ამ მარშრუტზე სატვირთო გადაზიდვების მოცულობის გაზრდისა და ტარიფების ოპტიმიზაციის საკითხები. შეხვედრის დასასრულს ხელი მოეწერა ურთიერთგაგების მემორანდუმს“, — ნათქვამია განცხადებაში.

„აზერბაიჯანის რკინიგზაში“ აღნიშნეს, რომ პირველი სატესტო საკონტეინერო მატარებელი Nomad Express-ი, მარშრუტით შიხეცზი-დოსტიკი-აქტაუ-ალიატი, ბაქოს საერთაშორისო საზღვაო სავაჭრო პორტში 2015 წლის 3 აგვისტოს შევიდა.

ტრანსკასპიური სატრანსპორტო მარშრუტით Nomad Express-ს ტვირთები ჩინეთიდან ევროპაში 10-12 დღეში ჩააქვს. ეს ამ დერეფნის ერთ-ერთი უპირატესობაა. ბაქო-თბილისი-ყარსის რკინიგზის მშენებლობის დასრულების შემდეგ დერეფნის ტვირთგამტარიანობა კიდევ მეტად გაიზრდება, ხოლო ტვირთის ადგილზე მიტანის ვადები შემცირდება.



წყარო : Sputnik საქართველო /www.sputnik-georgia.com/

წაკითხულია : 172


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები