პოლიტიკა

ხიდაშელი დარწმუნებულია, რომ 2017 წლიდან სავალდებულო სამხედრო სამსახური გაუქმდება

24.04.16 18:00


საქართველოს თავდაცვის მინისტრი თინათინ ხიდაშელი დარწმუნებულია, რომ სავალდებულო სამხედრო სამსახურის გაუქმების შესახებ გადაწყვეტილება ძალაში აუცილებლად 2017 წლის იანვრიდან შევა.

„ჩემი მთავარი სამი დაპირება არსებობდა… პირველი ჰაუპტვახტების გაუქმება იყო — ხელისუფლებამ მხარი დაუჭირა ამ ინიციატივას და ეს სისტემა გაუქმდა, მეორე — ჩვენ სპეცუბნების გაუქმების ინიციატივა დავაყენეთ და ჯერჯერობით საკითხი საპარლამენტო დონეზე დგას, თუმცა პარლამენტის საკომიტეტო მოსმენებიდან გამომდინარე, ამ საკითხთან მიმართებით რაიმე გართულებას არ ველოდებით და მჯერა, რომ სპეცუბნებიც გაუქმდება და ეს ჩემი მესამე დაპირებაა (საკონტრაქტო არმია — რედ.), რომელიც მსურს რამდენიმე თვეში დავასრულო… კონსულტაციების შედეგად დარწმუნებული ვარ, რომ ამ საკითხს წინააღმდეგობა არ ექნება“, — განაცხადა ხიდასელმა ტელეკომპანია „იმედის“ ეთერში.

მინისტრის სიტყვებით, ჯარში ნებაყოფლობითი სამსახური მისი, როგორც მინისტრის ინიციატივა იყო და ეს სურვილი როგორც სამხედრო მოსამსახურეების, ისე თავდაცვის უწყების ინტერესებთან არის თანხვედრაში.

„არ შეიძლება ამ ტიპის გადაწყვეტილების დამოუკიდებლად მიღება. ჩვენ უწყების შიგნით, სამხედრო მოსამსახურეებთან, არაერთი დებატი და განხილვა გავმართეთ და მოხარული ვარ, რომ გადაწყვეტილება ერთობლივად იქნა მიღებული“, — დასძინა მინისტრმა.

ხიდაშელმა ასევე აღნიშნა, რომ საკონტრაქტო სამსახური საბიუჯეტო ხარჯებს არ გამოიწვევს.
მოსალოდნელია, რომ სააღდგომო დღესასწაულების შემდეგ, თავდაცვის მინისტრი აღნიშნულ საკითხთან დაკავშირებით დეტალურ ინფორმაციასა და დოკუმენტაციას გაასაჯაროებს. ამასთან ერთად, ხიდაშელი არ გამორიცხავს, რომ თავდაცვის მინისტრის ცვლილების შემთხვევაში ვითარება შეიძლება შეიცვალოს. საქართველოში საპარლამენტო არჩევნები 8 ოქტომბერს არის დაგეგმილი.

წყარო : Sputnik საქართველო /www.sputnik-georgia.com/

წაკითხულია : 64


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები