ეკონომიკა

საქართველოს საგარეო სავაჭრო ბრუნვა 22%-ით გაიზარდა

16.02.17 14:50


2017 წლის იანვარში საქართველოს საგარეო სავაჭრო ბრუნვამ 651 მილიონი დოლარი შეადგინა (არაორგანიზებული ვაჭრობის გაუთვალისწინებლად), რაც 22%-ით აღემატება 2016 წლის ანალოგიურ პერიოდს.

წლის პირველ თვეში ექსპორტმა 177 მილიონი დოლარი შეადგინა, რაც 45%-ით მეტია 2016 წლის იანვრის მაჩვენებელზე. ნათქვამია სტატისტიკის ეროვნული სამსახურის „საქსტატის“ მასალებში. საქართველოს ექსპორტის სტრუქტურაში ძირითადი ადგილი ამ პერიოდში ფერად შენადნობებს, ღვინოს, დამუშავებულ და ნახევრად დამუშავებულ ოქროს, თხილს და კაკალს უჭირავს.

მსოფლიოში მოთხოვნის ზრდასთან ერთად, მოსალოდნელია ექსპორტის შემდგომი ზრდა, რაც მნიშვნელოვნად შეამცირებს გარე შოკების ნეგატიურ ზემოქმედებას და ხელს შეუწყობს ეკონომიკურ ზრდას, აღნიშნავენ საქართველოს ეკონომიკისა და ზრდადი განვითარების სამინისტროში.

2017 წლის იანვარში იმპორტმა 474 მილიონი დოლარი შეადგინა, რაც 15%-ით მეტია 2016 წლის ანალოგიურ მონაცემებზე. იმპორტის სტრუქტურაში ძირითადი ადგილი ნავთობსა და ნავთობპროდუქტებს უჭირავს, ასევე მსუბუქ ავტომანქანებს, ნავთობის აირებს, ხორბალს, ელექტრო-ტრანსფორმატორებს და მედიკამენტებს. საქართველოს უარყოფითმა სავაჭრო ბალანსმა საანგარიშო პერიოდში 298 მილიონი დოლარი შეადგინა, რაც საერთო სავაჭრო ბრუნვის 46%-ს შეადგენს.



წყარო : Sputnik საქართველო /www.sputnik-georgia.com/

წაკითხულია : 145


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები