პოლიტიკა

ზიგმარ გაბრიელი - ჩვენ მხარს ვუჭერთ საქართველოს ევროკავშირთან დაახლოებას და ვაფასებთ იმ დიდ ძალისხმევას, რაც რეფორმების გატარების კუთხით საქართველომ გასწია

27.04.17 16:15


მხარს ვუჭერთ საქართველოს ევროკავშირთან დაახლოებას და ვაფასებთ იმ დიდ ძალისხმევას, რაც რეფორმების გატარების კუთხით საქართველომ გასწია, - ამის შესახებ გერმანიის ფედერაციული რესპუბლიკის საგარეო საქმეთა მინისტრმა ზიგმარ გაბრიელმა საქართველო-გერმანიის წლის გახსნის ცერემონიის წინ ქართველ კოლეგასთან გამართულ ერთობლივ პრესკონფერენციაზე განაცხადა.

საგარეო საქმეთა სამინისტროს ინფორმაციით, გერმანიის საგარეო საქმეთა მინისტრმა ხაზგასმით აღნიშნა და საქართველო-ევროკავშირის ერთობლივ წარმატებად შეაფასა ის ფაქტი, რომ საქართველოს მოქალაქეებს ევროკავშირში უვიზოდ მოგზაურობის შესაძლებლობა აქვთ.

გერმანიის საგარეო უწყების ხელმძღვანელმა განსაკუთრებული მადლობა გადაუხადა ქართულ მხარეს საერთაშორისო სამშვიდობო მისიებში მონაწილეობისთვის და ავღანეთში, მაზარი შარიფის ბაზაზე ქართველი სამხედროების სიმამაცეზე ისაუბრა.

„ 1992 წლის აპრილში გერმანიამ პირველმა აღიარა საქართველოს დამოუკიდებლობა და პირველი საელჩო გახსნა თბილისში. საქართველოს მოსახლეობა იმ დროიდან მოყოლებული და მანამდეც ევროპაზეა ორიენტირებული - იმ დროს, როცა ევროპის ერთიანობას შიგნიდან ჰყავს სკეპტიკოსები, ეს ნამდვილად სასიხარულო ამბავია. ჩვენ ვცხოვრობთ დროში, როცა ხანდახან ევროპის გარეთ ევროპას უფრო აფასებენ, ვიდრე თავად ევროპაში. ამიტომ მხარს ვუჭერთ საქართველოს ევროკავშირთან დაახლოებას და ვაფასებთ იმ დიდ ძალისხმევას, რაც რეფორმების გატარების კუთხით საქართველომ გასწია.

ბევრმა გერმანიაში ალბათ არც კი იცის, რომ ავღანეთში, მაზარი შარიფში გერმანიის გენერალურ საკონსულოზე ტერორისტული თავდასხმის დროს სწორედ ქართველი ჯარისკაცები იყვნენ ისინი, ვინც გერმანელებს პირველი დახმარება აღმოუჩინეს, ამისათვის განსაკუთრებით დიდ მადლობას გიხდით და მნიშვნელოვანია, რომ ეს საჯაროდ, ხმამაღლაც განვაცხადოთ. განსაკუთრებით ჩვენს ქვეყანაში, სადაც ხანდახან გვავიწყდება, რომ რთულ ვითარებაში ჩვენც გვეხმარებიან. ის, რომ ამ შემთხვევაში საქართველო დაგვეხმარა, განსაკუთრებით სასიხარულოა“, - განაცხადა ზიგმარ გაბრიელმა.

ზიგმარ გაბრიელმა ასევე საქართველო-გერმანიის წლის შესახებ ისაუბრა, რომელიც ორი ქვეყნის მინისტრებმა ერთობლივი პრესკონფერენციის დასრულების შემდგომ საზეიმოდ გახსნეს. საუბრისას მინისტრმა აღნიშნა, რომ საიუბილეო წელი 12 თვის ნაცვლად 18 თვეს გასტანს.

„საქართველო-გერმანიის წელი უფრო დიდი ხანი გაგრძელდება, ვიდრე 12 თვე. 18 თვის განმავლობაში საქართველოსა და გერმანიაში 130-ზე მეტი საერთო ღონისძიება და პროექტი ჩატარდება. მხოლოდ ეს აჩვენებს თუ რამდენად მრავალფეროვანი და მდიდარია ჩვენი ურთიერთობები. წინ ძალიან საინტერესო წელი გველოდება”, - განაცხადა ზიგმარ გაბრიელმა.



წყარო : IPN /www.interpressnews.ge/

წაკითხულია : 100


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები