პოლიტიკა

იენს სტოლტენბერგი: ვარშავის სამიტზე ჩვენ კიდევ უფრო გავაძლიერებთ მხარდაჭერის პაკეტს საქართველოს მიმართ

09.06.16 14:30


ვარშავის სამიტზე ჩვენ კიდევ უფრო გავაძლიერებთ მხარდაჭერის პაკეტს საქართველოს მიმართ, – ამის შესახებ ნატოს გენერალურმა მდივანმა იენს სტოლტენბერგმა საქართველოს პრეზიდენტ გიორგი მარგველაშვილთან ერთობლივ პრესკონფერენციაზე, ბრიუსელში განაცხადა.

როგორც ნატოს გენერალურმა მდივანმა აღნიშნა, საქართველო ნატოსთვის ძალიან დასაფასებელი პარტნიორია. იენს სტოლტენბერგმა საქართველოს მიერ ნატოს ოპერაციებსა და მისიებში შეტანილი წვლილისთვის ქართველ ხალხს მადლობა გადაუხადა.

“ჩვენი პარტნიორობა არის ძლიერი და კიდევ უფრო ძლიერდება. საქართველო არსებითად ხელს უწყობს ევროატლანტიკურ უსაფრთხოებას. ქართველი ჯარისკაცები დგანან ნატოსთან ერთად წლების განმავლობაში. გამორჩეულ როლს ასრულებენ ჩვენ ოპერაციებში. ამჟამად, საქართველო არის მესამე უდიდესი კონტრიბუტორი ავღანეთში, მტკიცე მხარდაჭერის მისიაში.

ამისთვის გიხდით უდიდეს მადლობას და ასევე ქართველ ხალხს ვუხდი მადლობას, საქართველოს მიერ ნატოს ოპერაციებში და მისიებში შეტანილი მტკიცე წვლილისთვის“,-განაცხადა სტოლტენბერგმა.

მისივე შეფასებით, საქართველომ განახორციელა შთამბეჭდავი თავდაცვითი რეფორმები,რითიც უფრო დაუახლოვდა ნატოს.

“საქართველომ ასევე განახორციელა შთამბეჭდავი თავდაცვითი რეფორმები და თქვენ დაამყარეთ უფრო მწიფე დემოკრატია.

ამდენად, საქართველო უფრო დაუახლოვდა ნატოს და ჩვენ მზად ვართ, ამაში დაგეხმაროთ. ბოლო ორი წლის მანძილზე, ჩვენ ნატო-საქართველოს არსებითი პაკეტი წარვადგინეთ, საქართველოს თავდაცვისუნარიანობის გასაძლიერებლად.

განხორციელებაც კარგად მიმდინარეობს. გასულ წელს თბილისში ვიზიტის დროს, ჩემზე ძალიან დიდი შთაბეჭდილება მოახდინა ნატო-საქართველოს არსებითი პაკეტის განხორციელებამ. ჩვენი ერთობლივი გადამზადების და შეფასების ცენტრი თბილისში კარგად მუშაობს. ასევე დაიწყო ერთობლივი წვრთნები და ვფიქრობ, რომ ძალიან კარგია, როდესაც ქართველი ჯარისკაცები, ნატოს ჯარისკაცები და პარტნიორი ქვეყნების ჯარისკაცები ერთად გადიან წვრთნებს საქართველოში. ეს კარგია ჩვენთვის და კარგია ასევე საქართველოსთვის. ეს არის საქართველოს მიმართ და ჩვენი პარტნიორობის მიმართ ნატო-ში გამოხატული ძლიერი მხარდაჭერა. დაახლოებით ნატო-ს 30 ექსპერტი იმყოფება საქართველოში, რომლებიც თქვენ ქვეყანაში, თავდაცვის სფეროში, მიმდინარე რეფორმების განხორციელებაში გეხმარებიან და ამით მეტი წვლილი შემოაქვთ. ამდენად, ნატო ერთგული რჩება დაგეხმაროთ, რათა გააძლიეროთ უსაფრთხოება და განახორციელოთ რეფორმები.

მომდევნო თვეში, ვარშავის სამიტზე ჩვენ კიდევ უფრო გავაძლიერებთ მხარდაჭერის პაკეტს საქართველოს მიმართ. რაც ნათელი დადასტურება იქნება ჩვენი ძლიერი პოლიტიკური და პრაქტიკული მხარდაჭერისა საქართველოს მიმართ. დღევანდელ შეხვედრაზე, ჩვენ ასევე განვიხილეთ საქართველოს პროგრესი დემოკრატიული ინსტიტუტების გაძლიერების მხრივ, მათ შორის საპარლამენტო არჩევნებისთვის მომზადება და მიმდინარე კანონის უზენაესობისა და სასამართლო სისტემის დამოუკიდებლობის გაძლიერებისკენ მიმართული ძალისხმევა.

მივესალმები ყველა ამ სფეროში რეფორმების გაძლიერების ძალისხმევას. ეს რეფორმები ძალიან მნიშვნელოვანია. ამდენად, ბატონო პრეზიდენტო, კიდევ ერთხელ მოგესალმებით.

საქართველო და ნატო ერთმანეთს უახლოვდებიან და მივესალმები, რომ შეგვიძლია პარტნიორობის გაძლიერება. ჩვენ თქვენ მხარდაჭერას გავაგრძელებთ. ველი თქვენთან შეხვედრას ვარშავაში რამდენიმე კვირაში. ასე რომ, კიდევ ერთხელ მოგესალმებით,”- განაცხადა ნატოს გენერალურმა მდივანმა იენს სტოლტენბერგმა.


წყარო : /www.kvira.ge/

წაკითხულია : 631


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები