პოლიტიკა

შალვა პაპუაშვილი: ბედის ირონიაა, რომ „ქართული ოცნების“ დისკრედიტაციის მიზნით ჩაფიქრებული კამპანია, საბოლოოდ, ოპოზიციის და ზოგიერთი არასამთავრობო ორგანიზაციის დისკრედიტაციით დასრულდა

03.05.21 14:30


ძალიან გულუბრყვილო უნდა იყო, რომ ვერ დაინახო, როგორ შეთამაშებულად მოქმედებდნენ პარტიები და პარტიებთან დაკავშირებული ორგანიზაციები არჩევნებთან დაკავშირებით დეზინფორმაციის გავრცელებაში, - ამის შესახებ საპარლამენტო უმრავლესობის წევრი შალვა პაპუაშვილი Facebook-ზე წერს.

 

მისი განმარტებით, ორი თვის წინ factcheck.ge-ს მიმართა, „ევროპული საქართველოს“ მიერ არჩევნებთან დაკავშირებით გავრცელებული ინფორმაცია გადაემოწმებინა.

 

ორი თვის წინ მივმართე factcheck.ge-ს, გადაემოწმებინა „ევროპული საქართველოს“ ცნობილი ცხრილი. საქმე ეხება აბსოლუტურად გამოგონილი რიცხვების კიდევ უფრო დაუჯერებელ მანიპულაციას, რომლითაც „ევროპული საქართველო“, დღემდე, არჩევნების შედეგებს გაყალბებულად აცხადებს.

 

ყველა სიტყვის სისწორეზე მოდარაჯე factcheck.ge „ევროპული საქართველოს“ ამ ცხრილს არჩევნებიდან ოთხი თვის თავზეც, რატომღაც, ჯიუტად არ იმჩნევდა.

 

factcheck.ge-ს საჯაროდ მივმართე და პირადადაც მივწერე. მას შემდეგ ორი თვე გავიდა. რამდენჯერმე შეხსენების შემდეგ, ბოლოს, მომწერეს: პანდემიაა, ბევრი საქმე გვაქვს, მომავალ კვირას შევეცდებითო.

 

ის მომავალი კვირაც გავიდა. ან კი, ამაზე მნიშვნელოვანი რა საქმე აქვთ, რომ არჩევნებიდან ექვს თვეშიც კი ვერ შეძლეს „არჩევნების გაყალბების“ ასეთი თვალსაჩინო მტკიცებულების გადამოწმება.

 

გასაკვირი იქნებოდა, რომ არა ერთი ფაქტი. factcheck.ge სერგი კაპანაძის და ელენე ხოშტარიას მიერ 2012 წელს დაფუძნებული „საქართველოს რეფორმების ასოციაციის (GRASS)“ პროექტია. https://bit.ly/3vBt2cn

 

დეზინფორმაციის მხილება, ამ ორგანიზაციის ერთ-ერთი ძირითადი მიმართულებაა, რაშიც, სხვადასხვა დონორისგან 1 000 000 ლარამდე დაფინანსებას იღებს, თუმცა, როგორც ჩანს, ამხელს იმას, რაც უნდა და არ ამხელს იმას, რაც არ უნდა.

 

ალბათ, „არ უნდა და არ ამხელს“ კატეგორიიდანაა ისიც, რომ factcheck-ის ვერდიქტებს თუ დავუჯერებთ, სერგი კაპანაძის და ელენე ხოშტარიას ნათქვამები არასდროს ყოფილა ტყუილი ან მანიპულაციური, თქვენ წარმოიდგინეთ, მცდარიც კი არ ყოფილა… არასდროს…. საერთოდ….

 

ძალიან გულუბრყვილო უნდა იყო, რომ ვერ დაინახო, როგორ შეთამაშებულად მოქმედებდნენ პარტიები და პარტიებთან დაკავშირებული ორგანიზაციები არჩევნებთან დაკავშირებით დეზინფორმაციის გავრცელებაში.

 

და, ბედის ირონიაა, რომ „ქართული ოცნების“ დისკრედიტაციის მიზნით ჩაფიქრებული კამპანია, საბოლოოდ, ოპოზიციის და ზოგიერთი არასამთავრობო ორგანიზაციის დისკრედიტაციით დასრულდა.

 

სახელგატეხილ ოპოზიციაზე არც ვწუხვარ, მაგრამ, სამწუხაროა, რომ, როგორც ჩანს, ზოგიერთი არასამთავრობო ორგანიზაცია უცხოური ორგანიზაციების მიერ ნაჩუქარ ფულს, საზოგადოებრივი საქმის ნაცვლად, პარტიული დღის წესრიგის გატარებაში იყენებს.

 

P.S. სხვათა შორის, ბევრი სახელიანი ორგანიზაციაც იღებს დაფინანსებას დეზინფორმაციის წინააღმდეგ ბრძოლისთვის, მაგრამ არც ერთ მათგანს, სამწუხაროდ, ხმა არ ამოუღია, როცა არჩევნებთან დაკავშირებით ყალბი ინფორმაციის ნიაღვარი მოდიოდა და ამ ქვეყანას, სწორედ მაგ დროს, ყველაზე მეტად სჭირდებოდა სიყალბის და სიმართლის ერთმანეთისგან გარჩევა“, – წერს პაპუაშვილი.

 

 

წყარო :  /www.imedinews.ge/

წაკითხულია : 235


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები