საზოგადოება

ზუგდიდის ბოტანიკურ ბაღში შესვლა ფასიანი ხდება

21.01.22 17:00


ზუგდიდის ბოტანიკური ბაღში შესვლა 1 თებერვლიდან ფასიანი ხდება. ინფორმაციას ამის შესახებ თავად ბოტანიკური ბაღი ავრცელებს. იმოქმედებს შემდეგი ტარიფები:

 

 საქართველოს მოქალაქე – 2 ლარი;


 უცხო ქვეყნის მოქალაქე – 5 ლარი;


 საქართველოს აკრედიტებული უმაღლესი სასწავლებლების სტუდენტები -1 ლარი;


 სკოლის მოსწავლე 10 წელზე ზევით – 1 ლარი;


 ერთთვიანი აბონემენტი 1 ვიზიტორზე – 10 ლარი;


 სამთვიანი აბონემენტი 1 ვიზიტორზე – 25 ლარი;


 ექვსთვიანი აბონემენტი 1 ვიზიტორზე – 40 ლარი;


 ერთწლიანი აბონემენტი 1 ვიზიტორზე – 70 ლარი;


 ერთთვიანი საოჯახო ” მეგობარათი” აბონემენტი (არაუმეტეს 5 ადამიანი) – 20ლარი;


 სამთვიანი საოჯახო აბონემენტი “მეგობარათი” (არაუმეტეს 5 ადამიანი) – 35ლარი;


 პიკნიკი 1 ვიზიტორზე ( საქართველოს მოქალაქე) – 10 ლარი;


 კემპინგი 1 ვიზიტორზე (უცხო ქვეყნის მოქალაქე) – 15 ლარი;


 ფოტოსესია – 50 ლარი.


ზუგდიდის ბოტანიკური ბაღის ტერიტორიის უფასოდ დათვალიერების უფლებით ისარგებლებენ:

 

 ომის მონაწილეები;


 პენსიონრები;


 საპატიო ზუგდიდელები;


 ობოლი, მშობელთა მზრუნველობას მოკლებული მოზარდები;


 საქართველოს შეიარაღებული ძალების ვეტერანები და მათთან გათანაბრებული პირები;


 ოჯახები, რომელთა სოციალური სარეიტინგო ქულა არ არემატება 100-000-ს.
გასულ კვირას აუდიტის სამსახურმა გაავრცელა ინფორმაცია, რომ 2020 წელს ზუგდიდის ბოტანიკურ ბაღში მოლარე-კონსულტანტები იყვნენ დასაქმებულნი იმ ფონზე, როცა ბაღში შესვლა უფასო იყო.

 

“2020 წელს ა(ა)იპ − ბოტანიკური ბაღების მართვის ცენტრში დასაქმებული იყო 6 მოლარე-კონსულტანტი, რომელთა ხელფასებზე დაიხარჯა 50.3 ათასი ლარი.

 

აუდიტის ჯგუფის მიერ ბოტანიკური ბაღის დათვალიერებით გამოვლინდა, რომ ბაღში შესვლა უფასოა და სალაროები არ ფუნქციონირებს. შესაბამისად, ხელფასები გაიცემა პირებზე, რომელთა ფუნქცია-მოვალეობები არ არის შესრულებადი”, — ვკითხულობთ ანგარიშში.

 

ზუგდიდის ბოტანიკური ბაღი დამთვალიერებლებისთვის 2019 წლის 30 დეკემბერს გაიხსნა. როგორც ბაღის დირექტორი ზვიად ქარჩავა “ნეტგაზეთთან” საუბრისას დასძენს, იქ შესვლა თავდაპირველად ფასიანი იყო და ამიტომაც იყვნენ დასაქმებულნი მოლარეები.

 

თუმცა, როგორც ჰყვება, ვითარება პანდემიის კრიზისის დაწყების შემდეგ შეიცვალა.“[დაიწყო] პანდემია, ლოკდაუნი გამოცხადდა ქვეყანაში. ამ მოლარეებს მოქმედი ხელშეკრულება ჰქონდათ, ლოკდაუნი კი იყო რაღაც ვადით, ხომ? 1 კვირით, 1 თვით… ზუსტად არავინ იცოდა, როდის დამთავრდებოდა ლოკდაუნი.

 

რადგან ბოტანიკური ბაღი არის რეკრეაციული სივრცე, 26 ჰექტარი, სადაც ადამიანებს შეუძლიათ, თავისუფლად იმოძრაონ, მიიღეს გადაწყვეტილება, რომ ბაღი იყოს უფასო და ყველას ჰქონდეს აქ შემოსვლის შესაძლებლობა”, — დასძენს ქარჩავა.

 

მისივე თქმით, ადამიანებს, რომლებიც პანდემიამდე მოლარეებად საქმიანობდნენ,  კოვიდ-რეგულაციების დაცვის მაკონტროლებლის ფუნქცია მიენიჭათ და სწორედ ამ მისიით დარჩნენ სამუშაო ადგილებზე.

 

“იყო რეგულაციები: შემოსვლის დროს სიცხის გაზომვა, შეკრებების [შეზღუდვა], პირბადის ტარება… და ჩვენ, რახან პანდემია იყო, მოლარეებს დავაკისრეთ ეგ ფუნქცია, რომ სანამ ფასიანი [გახდებოდა შემოსვლა], მანამდე დაგვხმარებოდნენ ამ მიმართულებით.

 

ასევე, როცა უფასო გახდა შემოსვლა, ბევრი ხალხი შემოდიოდა, იყო ვანდალიზმის ფაქტები. ამიტომ გვჭირდებოდა ეს ადამიანები, რომ ზედამხედველის ფუნქციაც შეესრულებინათ”, — გვითხრა ბაღის დირექტორმა.

 

ზვიად ქარჩავას თქმით, ხსენებულ 6 ადამიანს კონტრაქტის ვადა ამოეწურათ და ამჟამად ბოტანიკურ ბაღს მოლარე-ოპერატორები აღარ ჰყავს. თუმცა, მისივე განმარტებით, შესაბამისი შტატი კვლავ არსებობს და როცა ბაღში შესვლა ფასიანი გახდება, ადმინისტრაცია ისევ მოძებნის 6 მოლარეს.

 

 

წყარო :  /www. netgazeti.ge/

წაკითხულია : 118


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები