პოლიტიკა

ირაკლი ღარიბაშვილი აშშ-ის საერთაშორისო განვითარების საფინანსო კორპორაციის (DFC) აღმასრულებელ დირექტორ სკოტ ნათანს შეხვდა

22.06.22 12:20


საქართველოს პრემიერ-მინისტრი ირაკლი ღარიბაშვილი ამერიკის შეერთებული შტატების საერთაშორისო განვითარების საფინანსო კორპორაციის (DFC) აღმასრულებელ დირექტორს სკოტ ნათანს შეხვდა.

 

პრემიერ-მინისტრის პრესსამსახურის ინფორმაციით, შეხვედრაზე ყურადღება გამახვილდა საქართველოსა და ამერიკის შეერთებულ შტატებს შორის არსებულ სტრატეგიულ პარტნიორობაზე.

 

საუბრისას განიხილეს  საქართველოსა და DFC-ის შორის უკვე არსებული და სამომავლო თანამშრომლობის პერსპექტივები, მათ შორის, ეკონომიკური თანამშრომლობის გაძლიერებისა და ინვესტიციების მოზიდვის მიმართულებით.

აღინიშნა აშშ-ის საერთაშორისო განვითარების საფინანსო კორპორაციის მნიშვნელოვანი როლი ქვეყანაში ფინანსური სექტორის გაძლიერებაში. ირაკლი ღარიბაშვილმა სკოტ ნათანს დაუდასტურა საქართველოს მთავრობის მტკიცე მხარდაჭერა DFC-ის რეგიონული ოფისის შექმნის გეგმაზე.

 

DFC-ი ამერიკის შეერთებული შტატების მთავრობის ერთ-ერთი მთავარი საფინანსო ინსტიტუტია, რომელიც საქართველოსთან 90-იანი წლებიდან თანამშრომლობს. აშშ-ის საერთაშორისო განვითარების საფინანსო კორპორაციის მიერ 1993 წლიდან 800 მლნ დოლარის ინვესტიცია განხორციელდა 60-ზე მეტ პროექტში.

 

მთავრობის ადმინისტრაციაში გამართულ შეხვედრას ამერიკის შეერთებული შტატების ელჩის მოადგილე რაიან ჰარისი, DFC-ის დელეგაციის წევრი ნაზ ელ-ხატიბი, აშშ-ის საელჩოს პოლიტიკური ოფიცერი აარონ რუპერტი, აშშ-ის საერთაშორისო განვითარების სააგენტოს USAID/საქართველოს ეკონომიკური ზრდის ოფისის ხელმძღვანელი მარიკა ოლსონი, ხოლო საქართველოს მხრიდან, ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი და ფინანსთა მინისტრი ლაშა ხუციშვილი ესწრებოდნენ.

 

 

წყარო :  /www.1tv.ge/

წაკითხულია : 289


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები