პოლიტიკა

სოზარ სუბარი - კარგი იქნება, თუ ჩვენი კოლეგები მკაფიოდ დააფიქსირებენ თავის პოზიციას აშშ-ის საელჩოს ინსტრუქციებში გამოთქმულ პრობლემებზე

17.08.22 16:30


კარგი იქნება, თუ ჩვენი კოლეგები მკაფიოდ დააფიქსირებენ თავის პოზიციას აშშ-ის საელჩოს ინსტრუქციებში გამოთქმულ პრობლემებზე, – ამის შესახებ მოძრაობა „ხალხის ძალის“ წევრი, დეპუტატი სოზარ სუბარი სოციალურ ქსელში წერს.

 

„გუშინ სასამართლოს თემაზე ჩვენს მიერ გამოქვეყნებულ წერილს საკმაოდ კრიტიკული გამოხმაურება მოჰყვა პარლამენტის არაერთი წევრისგან, ამიტომ, კარგი იქნება, თუ ჩვენი კოლეგები მკაფიოდ დააფიქსირებენ თავის პოზიციას საელჩოს ინსტრუქციებში გამოთქმულ პრობლემებზე:

 

– ეთანხმებით თუ არა აშშ-ის საელჩოს ინსტრუქციას, რომ საქართველოს პარლამენტმა უნდა შეცვალოს ხუთი კონსტიტუციური ნორმა, თანაც ის ნორმები, რომლებიც ვენეციის კომისიის მიერ უკვე არის სამართლიანად და უხარვეზოდ შეფასებული? მიგაჩნიათ თუ არა, რომ ამ მოთხოვნების ასეთი ფორმით დაყენება სახელმწიფოს მიმართ უპატივცემულო და უხეში დამოკიდებულების გამოვლინებაა?

 

– ეთანხმებით თუ არა საელჩოს ინსტრუქციას, რომ საქართველოს პარლამენტმა უზენაესი სასამართლოს მოსამართლეები უნდა აირჩიოს არა ჩვეულებრივი, არამედ 3/5-ის უმრავლესობით, ხოლო იუსტიციის უმაღლესმა საბჭომ მოსამართლეები უნდა დანიშნოს და წარადგინოს ორმაგი 2/3-ის უმრავლესობით? აქვე შეგახსენებთ, რომ საელჩოს ინსტრუქციაში შემოთავაზებულ ამ ნორმებს დემოკრატიულ სამყაროში ანალოგი არ აქვს.

 

– მიგაჩნიათ თუ არა, რომ საელჩოს ინსტრუქცია, უვადოდ დაინიშნოს უზენაესი სასამართლოს სამი მოსამართლე, არის საქართველოს კონსტიტუციის დარღვევა, უხეში ჩარევა ორი კონსტიტუციური ორგანოს – საქართველოს პარლამენტისა და საქართველოს იუსტიციის უმაღლესი საბჭოს საქმიანობაში და სახელმწიფოს მიმართ უპატივცემულო და უხეში დამოკიდებულების გამოვლინებაა?

 

– მიგაჩნიათ თუ არა, რომ საელჩოს მიერ იუსტიციის უმაღლესი საბჭოს იგნორირებით ფავორიტი მოსამართლეების გამორჩევა, რომლებიც განსაკუთრებული პრივილეგიებით სარგებლობენ საელჩოს მიერ ორგანიზებული ვიზიტების, ტრენინგებისა და სემინარების დაგეგმვისას, არის გაუმართლებელი, დისკრიმინაციული და მიზნად ისახავს სასამართლო სისტემაში არაფორმალური გავლენების გაძლიერებას და კლანური და სელექციური მიდგომების დამკვიდრებას?

 

– მიგაჩნიათ თუ არა, რომ იუსტიციის უმაღლესი საბჭოს გვერდის ავლით ელჩის ვიზიტები სასამართლოებში არის უპატივცემლობა ამ კონსტიტუციური ორგანოს მიმართ?

 

– მიგაჩნიათ თუ არა ნორმალურ პრაქტიკად, როდესაც საელჩოს წარმომადგენლები სამუშაო ჯგუფებში უშუალოდ სხედან და კანონშემოქმედებით პროცესში იღებენ მონაწილეობას?

 

– მიგაჩნიათ თუ არა, რომ სასამართლოს თავმჯდომარეების არჩევითობა ნიშნავს სასამართლო სისტემაში პოლიტიკის შეტანას, მოსამართლეებს შორის პერსონალური კონფლიქტების პროვოცირებასა და სისტემის დესტაბილიზაციას და ეთანხმებით თუ არა ამ ინსტრუქციას? აპირებთ თუ არა ამ ინსტრუქციის განხორციელებას? და თუ თქვენთვის მიუღებელია ამ ინსტრუქციის განხორციელება, როგორ ფიქრობთ, რატომ იძლევა საელჩო ასეთ ინსტრუქციას?

 

აქვე გავიმეორებ, რომ სასამართლოს თავმჯდომარეების არჩევითობას განვითარებულ დემოკრატიულ ქვეყნებში ანალოგი არ აქვს.

 

– და ბოლოს, საინტერესო იქნება კოლეგების აზრი – როდესაც მოსამართლე ლაშა ჩხიკვაძე ღიად ლაპარაკობს მის მიმართ განხორციელებულ ზეწოლაზე და არაფორმალურ სანქციაზე, მიგაჩნიათ თუ არა, რომ საზოგადოება იმსახურებს ამ თემაზე უფრო მკაფიო და დამაჯერებელ პასუხს?“, – წერს სოზარ სუბარი „ფეისბუქზე“.

 

 

 

წყარო :  /www.1tv.ge/

წაკითხულია : 199


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები