პოლიტიკა

ოპოზიციური გაერთიანება “ნაციონალური მოძრაობის” გარეშე — ჯაფარიძის პოზიცია

07.06.23 12:20


პარტია “ლელო” მხარს უჭერს ისეთი ოპოზიციური გაერთიანების შექმნას, რომელშიც “ნაციონალური მოძრაობა” არ იქნება. აღნიშნულის შესახებ პარტიის ერთ-ერთმა ლიდერმა, ბადრი ჯაფარიძემ ისაუბრა და დასძინა, რომ ორპოლუსიანობა “ქართული ოცნების” ინტერესებში შედის.

 

ჯაფარიძე “პალიტრანიუსის” გადაცემა “პოლიტიკურ სივრცეში” 6 ივნისს იყო მიწვეული. წამყვანმა გაიხსენა ენმ-ის თავმჯდომარის, ლევან ხაბეიშვილის კომენტარი, რომლის თანახმადაც, “ბიძინა ივანიშვილის დამარცხების გასაღები” სწორედ “ნაციონალურ მოძრაობას” აქვს.

 

“ჩვენთან უნდა ისაუბროს ყველამ. ენის მოჩლექით კი არ უნდა ველაპარაკოთ ვინმეს… მოვიდნენ და თუ უნდათ, მივეხმარებით ამ გასაღების გადამრავლებაში, რომ 5 და 7% მიიღონ, რათა ხვალ ზეგ იყოს კოალიციური მთავრობა”, — თქვა ხაბეიშვილმა სხვა ოპოზიციური პარტიების მისამართით.
ბადრი ჯაფარიძეს ჰკითხეს, ეთანხმება თუ არა იდეას, რომ “ნაციონალური მოძრაობის” გარეშე მმართველი პარტიის დამარცხება არ გამოვა.

 

“მე არ ვიზიარებ ამ განცხადებას. “ნაციონალური მოძრაობა” “ქართული ოცნებისთვის” არის შესანიშნავი სამიზნე. “ნაციონალური მოძრაობის” და „ქართული ოცნების“ მიერ შექმნილი პოლიტიკური ველი, რომელიც გულისხმობს ორპოლუსიან ველს, აბსოლუტურად ხელს აძლევს “ქართულ ოცნებას”, — დასძენს ჯაფარიძე.
მისი სიტყვებით, “ლელოს” ამოცანა მკაფიოა: “შევქმნათ ალტერნატიული მიზიდულობის ცენტრი, დაიმსხვრეს ეს ორპოლუსიანობა”.

 

“…სწორედ ისეთი გაერთიანების შექმნაა გასაღები, რომელშიც მონაწილეობას არ მიიღებს „ნაციონალური მოძრაობა“. ასეთი გაერთიანების შექმნაა „ქართული ოცნების“ დამარცხების გასაღები.

 

ამიტომ ჩვენ ხელს შევუწყობთ ასეთი პროევროპული პარტიების ერთობის შექმნას, რომელიც ორიენტირებული იქნება სწორედ იმაზე, რომ დაამსხვრიოს ეს ორპოლუსიანობა; იმუშავებს იმ ელექტორატთან, რომელიც არ აპირებს, ხმა მისცეს „ქართულ ოცნებას“ და „ნაციონალურ მოძრაობას“.

 

სწორედ ეს არის გასაღები “ქართული ოცნების” დამარცხებისა და შეცვლისა”, — აღნიშნავს “ლელოს” ლიდერი.


ჯაფარიძის თქმით, ხსენებული გაერთიანება მოქმედი ხელისუფლება “დემოკრატიული, კოალიციური მმართველობით” ჩანაცვლებისკენ იქნება მიმართული.

 

მომდევნო საპარლამენტო არჩევნები საქართველოში 2024 წელს უნდა ჩატარდეს.

 

 

 

 

წყარო :  /www. netgazeti.ge/

წაკითხულია : 190


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები