პოლიტიკა

საარჩევნო ადმინისტრაციის დელეგაცია გიორგი კალანდარიშვილის ხელმძღვანელობით სომხეთში ქალაქის უხუცესთა არჩევნებს დააკვირდა

19.09.23 12:20


საარჩევნო ადმინისტრაციის დელეგაცია ცენტრალური საარჩევნო კომისიის თავმჯდომარე გიორგი კალანდარიშვილის ხელმძღვანელობით სომხეთში, ერევნის უხუცესთა საბჭოს არჩევნებს დააკვირდა, - ამის შესახებ ინფორმაციას ცესკო ავრცელებს.

 

მათივე ინფორმაციით, საარჩევნო ადმინისტრაციის წარმომადგენლები ერევანში სომხეთის ცენტრალური საარჩევნო კომისიის მიწვევით იმყოფებოდნენ. ისინი სადამკვირვებლო მისიაში საერთაშორისო დამკვირვებლის სტატუსით მონაწილეობდნენ. სხვადასხვა სადამკვირვებლო ჯგუფში გადანაწილებული დელეგაციის წევრები დააკვირდნენ როგორც საარჩევნო უბნების გახსნის, ისე კენჭისყრის მიმდინარეობისა და დახურვის პროცედურებს. ასევე დაესწრნენ საინფორმაციო ბრიფინგს, სადაც სომხეთის ცენტრალური საარჩევნო კომისიამ საარჩევნოდ გაწეული სამუშაოების შესახებ დეტალური ინფორმაცია მიაწოდა.

 

როგორც გიორგი კალანდარიშვილმა აღნიშნა, ქართული დელეგაციისთვის განსაკუთრებულად საინტერესო იყო თუ როგორ მიმდინარეობდა ამომრჩეველთა ვერიფიკაციის პროცედურები ელექტრონული აპარატების გამოყენებით - „აღსანიშნავია, რომ სომხეთის საარჩევნო ადმინისტრაცია, საერთაშორისო კომპანია „სმარტმატიკთან“ პარტნიორობით, წარმატებით იყენებს ამომრჩეველთა ვერიფიკაციის აპარატებს. შეიძლება ითქვას, რომ სწორედ იდენტური ვერიფიკაციის აპარატების გამოყენებით ჩვენ საქართველოში უკვე ჩავატარეთ შუალედური და რიგგარეშე არჩევნები, და ასევე გამოვიყენებთ 2024 წელსაც. ვიზიტის ფარგლებში მოგვეცა შესაძლებლობა სომეხ კოლეგებთან გაგვეცვალა ინფორმაცია ვერიფიკაციის აპარატების გამოყენების შესახებ“.

 

მისივე თქმით, ვიზიტის ფარგლებში ასევე გაიმართა შეხვედრები არჩევნებზე დაკვირვების მიზნით მყოფი სხვა ქვეყნების საარჩევნო ადმინისტრაციების წარმომადგენლებთან. მხარეებმა განიხილეს საარჩევნო საკითხებზე სამომავლო თანამშრომლობის საკითხები.

 

ერევნის უხუცესთა საბჭოს არჩევნები 17 სექტემბერს გაიმართა. საქართველოს სადამკვირვებლო დელეგაციაში გიორგი კალანდარიშვილთან ერთად ასევე იმყოფებოდნენ საარჩევნო სისტემების განვითარების, რეფორმებისა და სწავლების ცენტრის დირექტორი ნათია ზაალიშვილი, ცესკოს იურიდიული დეპარტამენტის უფროსი გიორგი სანტურიანი, ნინოწმინდის საოლქო საარჩევნო კომისიის თავმჯდომარე სეირან კიურეღიანი, ახალქალაქის საოლქო საარჩევნო კომისიის თავმჯდომარე ჰასმიკ მარანგოზიანი, სწავლების ცენტრის სასწავლო პროგრამების სამსახურის უფროსი მაია გუდაძე და სასწავლო რესურსების შემუშავებისა და განვითარების მენეჯერი თორნიკე გოგისვანიძე.

 

 

წყარო :  /www.imedinews.ge/

წაკითხულია : 154


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები