შარლ მიშელი - გულწრფელად ვიმედოვნებ, რომ საქართველოს მთავრობა შეიტანს სიმკვეთრეს განზრახვებში

14.05.24 16:23


გულწრფელად ვიმედოვნებ, რომ საქართველოს მთავრობა შეიტანს სიმკვეთრეს განზრახვებში, მაგრამ თუ სურთ ევროკავშირში გაწევრიანება, პატივი უნდა სცენ კანონის უზენაესობას, – ამის შესახებ ევროპული საბჭოს პრეზიდენტმა, შარლ მიშელმა კოპენჰაგენში გამართულ დემოკრატიის სამიტზე განაცხადა.

 

ამასთან, შარლ მიშელის თქმით, „იმედგაცრუებულია იმით, რაც საქართველოში ხდება“.

 

„რატომ? რადგან რამდენიმე წლის წინ მქონდა შესაძლებლობა, მეთამაშა როლი, დავხმარებოდი პოლიტიკური სისტემის განბლოკვაში. ასევე, რამდენიმე თვის წინ, შემიძლია გითხრათ, რომ ევროპულ საბჭოში, 27 წევრ სახელმწიფოში არ იყო უმრავლესობის მხარდაჭერა საქართველოსთვის კანდიდატის სტატუსის მინიჭებაზე, მაგრამ ჩვენ, რამდენიმე ევროპელ ლიდერთან ერთად დარწმუნებული ვიყავით, რომ ბევრი მიზეზით, ეს იყო კარგი არჩევანი, მიგვენიჭებინა კანდიდატის სტატუსი საქართველოსთვის. ჩვენ ძალიან ბევრს ვმუშაობდით, მათ შორის, საქართველოს მთავრობასთან, რომ დაგვერწმუნებინა ისინი, განეხორციელებინათ რეფორმები, რომლებიც აბსოლუტურად საჭირო იყო და გასულ წელს გადაედგათ რამდენიმე მნიშვნელოვანი ნაბიჯი. გასული წლის ბოლოს ჩვენ მივანიჭეთ კანდიდატის სტატუსი. რამდენიმე კვირის შემდეგ ჩვენ ვხედავთ მცდელობას, მიიღონ ეს კანონპროექტი. ვნახოთ, რას გააკეთებს პრეზიდენტი. მას აქვს ვეტოს უფლება.

 

ჩვენ ვაკვირდებით გარკვეულ რიტორიკას, რომელიც არ არის პოზიტიური. ჩვენ კონტაქტზე ვართ საქართველოს მთავრობასთან. გულწრფელად ვიმედოვნებ, რომ საქართველოს მთავრობა შეიტანს სიმკვეთრეს განზრახვებში, მაგრამ თუ მათ უნდათ ევროკავშირთან დაახლოება, თუ სურთ ევროკავშირში გაწევრიანება, პატივი უნდა სცენ კანონის უზენაესობას და დემოკრატიულ პრინციპებს. მკაფიო უნდა ვიყოთ და ჩვენ ვართ ძალიან მკაფიოები. გულწრფელად ვიმედოვნებ, რომ ჩვენ წარმატებას მივაღწევთ მათ დარწმუნებაში, შეასრულონ ევროკავშირში გასაწევრიანებლად საჭირო პირობები“, – განაცხადა შარლ მიშელმა.

 

ამასთან, მიშელის განცხადებით, ძალიან ნათელია, რომ რუსეთის მიზანია, ყველგან ძირი გამოუთხაროს დემოკრატიულ პრინციპებს ან კანონის უზენაესობის გაძლიერების მცდელობას.

 

„სწორედ ამიტომ, ჩვენ მხარი უნდა დავუჭიროთ ყველა ამ ადამიანს საქართველოში. მე ვიცი, რომ ქართველი ხალხის აბსოლუტურ უმრავლესობას სურს ევროკავშირთან დაახლოება, სურს ევროკავშირის წევრობა და მათ უნდა იგრძნონ, რომ ჩვენ მათ მხარს ვუჭერთ, ვაკეთებთ ყველაფერს, რაც შესაძლებელია, რათა წინააღმდეგობა გავუწიოთ რუსეთის ამ მცდელობებს, ძირი გამოუთხაროს ევროკავშირში გაწევრიანების ქართულ ოცნებას.

 

ჩვენ ვართ კანონის უზენაესობის მხარეს. ჩვენ ვართ თავისუფლების, დემოკრატიული პრინციპების მხარეს და ვაპირებთ, გამოვიყენოთ ჩვენს ხელთ არსებული ინსტრუმენტები, რათა ვცადოთ საქართველოს ხელისუფლების დარწმუნება, გააკეთონ, რაც საჭიროა. საქართველოში რამდენიმე თვეში იქნება არჩევნები და გულწრფელად ვიმედოვნებ, რომ ეს აჩევნები ასევე იქნება ლეგიტიმურობის მიცემის, მკაფიო სიგნალის გაგზავნის შესაძლებლობა, რა მიმართულება სურთ თავიანთი ქვეყნისთვის“, – განაცხადა შარლ მიშელმა.

 

 

1tv.ge

წაკითხულია : 235


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები