ეკონომიკა

საქართველოს გზებს კორეული კომპანია გაარემონტებს

28.10.17 15:00


სამხრეთკორეულმა კომპანიამ მთელი საქართველოს მასშტაბით შიდა გზების რემონტზე გამოცხადებულ ტენდერში გაიმარჯვა.

„ჩვენ ვიწყებთ შიდა გზების რეაბილიტაციის მსხვილ პროექტს. ტენდერში გამარჯვებულია კორეული კომპანია, რომელიც 6 თვეში დეტალურ პროექტებს დადებს“, — ციტირებს პრემიერ-მინისტრ გიორგი კვირიკაშვილს მთავრობის პრესსამსახური.

მისი თქმით, იგეგმება ისეთი მნიშვნელოვანი გზების განვითარება, როგორებიც არის: აჩხოტი-სნო-ახალციხე-ჯუთა (20 კმ); წიწამური-საგურამო-ცხვარიჭამია (20,8 კმ); სადახლო-ახკერპი — საქართველო-სომხეთის საზღვართან (26,2 კმ); საქართველო-აზერბაიჯანის საზღვართან არხილოსკალო-სამთაწყარო (6 კმ), წალენჯიხა-ჯვარი-ჯიხაშკარი; გუფთა-ონი (64,2 კმ); თბილისი (პანტიანი)-მანგლისი (32 კმ).

„ვფიქრობთ, ძალიან მნიშვნელოვანია ამდენი შიდა გზის რეაბილიტაციის პროექტი, რაც, უპირველეს ყოვლისა, გზებს მოაწესრიგებს და გააჩენს ბევრ სამუშაო ადგილს ადგილობრივი მცხოვრებლებისთვის“, — განაცხადა გიორგი კვირიკაშვილმა.

პრემიერ-მინისტრის თქმით, გზების განვითარება და რემონტი საქართველოს მთავრობის ოთხპუნქტიანი გეგმის ერთ-ერთი მნიშვნელოვანი ნაწილია.

მთავრობის რეფორმების ოთხპუნქტიანი გეგმა ითვალისწინებს: ეკონომიკური განვითარების ხელშემწყობ რეფორმებს და სამუშაო ადგილების შექმნას, განათლების რეფორმას, რომელიც ეკონომიკურ განვითარებაზე იქნება ორიენტირებული, რეგიონებისა და ინფრასტრუქტურის განვითარებას და მმართველობის რეფორმას, რომელიც უზრუნველყოფს სახელმწიფო სტრუქტურების ეფექტურობასა და მეტ გამჭვირვალობას.



წყარო : Sputnik საქართველო /www.sputnik-georgia.com/

წაკითხულია : 127


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები