პოლიტიკა

უწყებათაშორისმა კომისიამ ეროვნული კონტრტერორისტული სტრატეგიის დოკუმენტს ერთხმად დაუჭირა მხარი

30.12.21 11:00


სახელმწიფო უსაფრთხოების სამსახურის ორგანიზებით, ტერორიზმის წინააღმდეგ ბრძოლის ეროვნული სტრატეგიისა და შესაბამისი სამოქმედო გეგმის შემმუშავებელი და შესრულების მონიტორინგის განმახორციელებელი უწყებათაშორისი მუდმივმოქმედი კომისიის მეხუთე სხდომა გაიმართა, - ამის შესახებ ინფორმაციას სახელმწიფო უსაფრთხოების სამსახური ავრცელებს.

 

მათივე ინფორმაციით, შეხვედრა სახელმწიფო უსაფრთხოების სამსახურის უფროსმა გრიგოლ ლილუაშვილმა გახსნა.

 

უსაფრთხოების სამსახურის უფროსმა ტერორიზმის წინააღმდეგ ბრძოლის შესახებ საქართველოს ეროვნული სტრატეგიისა და მისი სამოქმედო გეგმის მნიშვნელობაზე ისაუბრა, ასევე, საბჭოს ერთობლივი მუშაობის შედეგები შეაჯამა.

 

„შევაჯამეთ გასული წლის სამოქმედო გეგმით გათვალისწინებული ღონისძიებების შესრულების დონე, ასევე, ჩვენი ერთობლივი საქმიანობის შედეგები, რაც დადებითად შეფასდა. ვიმსჯელეთ რეკომენდაციებზე, რომლებიც ჩვენი საბჭოს სახელით გაეგზავნება როგორც საქართველოს მთავრობას, ისე საქართველოს პარლამენტს. არის რამდენიმე რეკომენდაცია, რომლის გათვალისწინება გააძლიერებს უწყებათაშორის კოორდინაციას და აუცილებლად დადებით შედეგებს მოგვცემს კონტრტერორისტული მიმართულებით.


დღეს, ასევე, ვიმსჯელეთ მომავალი სამოქმედო გეგმის შესახებ, ერთხმად მოვიწონეთ და მივიღეთ, როგორც დოკუმენტი, რომლის მეშვეობითაც 2022 წლის განმავლობაში მოხდება საბჭოს წევრი უწყებების მხრიდან რეაგირება“ - განაცხადა გრიგოლ ლილუაშვილმა.

 

უწყებათშორის სხდომაზე, სახელმწიფო უსაფრთხოების სამსახურის კონტრტერორისტული ცენტრის უფროსის მოადგილემ ბაჩა მგელაძემ, საერთაშორისო ტერორიზმთან დაკავშირებულ საფრთხეებსა და გამოწვევებზე პრეზენტაცია გამართა და ტერორიზმის მიმართულებით ქვეყანაში არსებული გამოწვევები შეაჯამა. ასევე
მოხსენებით წარდგა სახელმწიფო უსაფრთხოების სამსახურის საინფორმაციო ანალიტიკური დეპარტამენტის დირექტორი, გიორგი საბედაშვილი, რომელმაც, 2021 წელს უწყებათაშორისი კომისიის მუშაობა შეაჯამა და 2022-2025 წლის კონტრტერორისტული სტრატეგიის პრეზენტაცია წარადგინა.

სხდომის დასასრულს, კომისიის წევრებმა, ეროვნული კონტრტერორისტული სტრატეგიის დოკუმენტი, კენჭისყრის შედეგად, ერთხმად მიიღეს. გრიგოლ ლილუაშვილმა კომისიის წევრი უწყებების ხელმძღვანელებს გაწეული სამუშაოსათვის მადლობა გადაუხადა.

 

 

წყარო :  /www.imedinews.ge/

წაკითხულია : 145


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები