პოლიტიკა

გიორგი ამილახვარი ოლივერ ვარჰეის შეხვდა

29.06.23 11:20


საქართველოს განათლებისა და მეცნიერების მინისტრმა, გიორგი ამილახვარმა ბრიუსელში ვიზიტის ფარგლებში ევროკომისართან გაფართოებისა და სამეზობლო საკითხებში, ოლივერ ვარჰეისთან შეხვედრა გამართა, სადაც მხარეებმა განათლების სხვადასხვა საფეხურზე მიმდინარე და დაგეგმილი პროექტები განიხილეს.

 

მინისტრმა ევროკომისარს მადლობა გადაუხადა საქართველოს მხარდაჭერისთვის ევროკავშირისკენ მიმავალ გზაზე და ხაზი გაუსვა საქართველოსთვის ევროპული პერსპექტივის მინიჭების ისტორიულ მნიშვნელობას, რამაც გაამყარა საქართველოს უპირობო კუთვნილება ევროპისადმი და გაუხსნა გზა ევროკავშირის წევრობისაკენ.

 

გიორგი ამილახვარმა ყურადღება გაამახვილა საქართველოს მიერ ევროკომისიის 12 პრიორიტეტის განხორციელების პროცესზე და ხაზი გაუსვა წლის ბოლოს ქვეყნისთვის კანდიდატი სტატუსის მინიჭების მნიშვნელობას. შეხვედრისას საუბარი ასევე შეეხო განათლებისა და მეცნიერების მიმართულებით საქართველოსა და ევროკავშირს შორის არსებულ თანამშრომლობას და მიმდინარე ერთობლივ პროექტებს.

 

მინისტრმა ოლივერ ვარჰეის დეტალური ინფორმაცია მიაწოდა საქართველოს განათლებისა და მეცნიერების სამინისტროსა და ევროკავშირის უნიკალური პროექტის – აღმოსავლეთ პარტნიორობის ევროპული სკოლის შესახებ. მისი თქმით, ევროპული სკოლის იდეის განხორციელება, რომელიც საქართველოში საერთაშორისო სტანდარტების შესაბამისი სასწავლო დაწესებულების დაარსებას ითვალისწინებს, უმნიშვნელოვანესი წინგადადგმული ნაბიჯია ევროკავშირისკენ მიმავალ გზაზე.

 

მხარეებმა უმაღლესი განათლების კუთხით დაგეგმილი სიახლეებიც განიხილეს და Erasmus-ის პროგრამის ფარგლებში პარტნიორობის გაფართოების გზებზე იმსჯელეს. გიორგი ამილახვარმა ევროკომისართან ქართველი სტუდენტებისთვის მხარდამჭერი ინიციატივების განხორციელებაზე ისაუბრა. კერძოდ, მინისტრმა იმ მექანიზმების შემუშავების აუცილებლობას გაუსვა ხაზი, რომლებიც ქართველ ახალგაზრდებს იმავე პირობებით სარგებლობის საშუალებას მისცემს, რითიც ევროპელი სტუდენტები სარგებლობენ.

 

შეხვედრაზე ასევე საუბარი შეეხო საქართველოს განათლებისა და მეცნიერების ერთიან ეროვნულ სტრატეგიას, რომლის შემუშავების პროცესშიც ევროკავშირი აქტიურად იყო ჩართული. გიორგი ამილახვარმა ევროკომისიისგან სტრატეგიის სამოქმედო გეგმის იმპლემენტაციის პროცესში მხარდაჭერის იმედი გამოთქვა. ევროკომისარმა ოლივერ ვარჰეიმ მადლობა გადაუხადა მინისტრს მჭიდრო თანამშრომლობისთვის და მხარდაჭერა აღუთქვა ერთობლივი საგანმანათლებლო პროექტების განხორციელების საქმეში, რაც უმნიშვნელოვანესია საქართველოს განათლებისა და მეცნიერების სისტემის ევროკავშირის კანონმდებლობასთან დაახლოების დასაჩქარებლად.

 

 

 

 

წყარო :  /www.1tv.ge/

წაკითხულია : 163


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები