მსოფლიო

“ფართომასშტაბიანი აგრესია ეთნიკური წმენდისთვის” – ერევანი ყარაბაღის ამბებზე

19.09.23 17:00


სომხეთის საგარეო საქმეთა სამინისტრომ განაცხადა, რომ სიმართლეს არ შეესაბამება ბაქოს განცხადება იმაზე, რომ სომხეთის შეიარაღებული ძალები მთიანი ყარაბაღის ტერიტორიაზე იმყოფებიან.

 

“ესაა ფართომასშტაბიანი აგრესია მთიანი ყარაბაღის მოსახლეობის წინააღმდეგ, რომელიც მიმართულია ეთნიკური წმენდის პოლიტიკის დასრულებისკენ. დაუსჯელობის გრძნობის გამო ბაქომ ღიად აიღო აგრესიაზე პასუხისმგებლობა”, – ნათქვამია საგარეოს განცხადებაში.

 

სომხეთის პრემიერ-მინისტრმა ნიკოლ ფაშინიანმა დღეს, 19 სექტემბერს მთიან ყარაბაღში აზერბაიჯანის მიერ დაწყებული საბრძოლო მოქმედებების გამო, რომელსაც ბაქო ანტი-ტერორისტულ ზომებს უწოდებს, უშიშროების საბჭოს სხდომა მიიწვია.

 

მთიანი ყარაბაღის ტერიტორიაზე, რომელსაც ამ ეტაპზე აზერბაიჯანული მხარე არ აკონტროლებს, აზერბაიჯანმა შეტევა დაიწყო. ბაქოს ცნობით, ის ანტიტერორისტულ ოპერაციას ატარებს.

 

სტეპანაკერტში [დე ფაქტო დედაქალაქი] აფეთქებების ხმაა, მოსახლეობა ევაკუაციისთვის სარდაფებში ჩავიდა.

 

აზერბაიჯანის თავდაცვის სამინისტრო აცხადებს, რომ მისი მიზანი მშვიდობიანი მოქალაქეები და სამოქალაქო ინფრასტრუქტურა არაა და მხოლოდ სამხედრო ობიექტებს უტევს, თუმცა, სოციალურ ქსელში გავრცელებული ვიდეო მასალებში ჩანს, რომ ჭურვები საცხოვრებელი კორპუსებს მოხვდა და დააზიანა. ამ ეტაპზე ყარაბაღში მსხვერპლზე ინფორმაცია არ გავრცელებულა.

 

 

წყარო :  /www. netgazeti.ge/

წაკითხულია : 217


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები