პოლიტიკა

სასამართლო რეფორმის სამუშაო ჯგუფმა პირველი სხდომა გამართა

05.08.22 17:00


იურიდიულ საკითხთა კომიტეტის სამუშაო ჯგუფმა, რომელიც სასამართლო რეფორმის საკითხებზე მუშაობს, პირველი სხდომა გამართა.

 

სხდომის მონაწილეებმა მოახდინეს იმ საკითხების იდენტიფიცირება, რომლებიც, მათი აზრით, სასამართლო სისტემის გამოწვევებს წარმოადგენს.

 

კომიტეტის თავმჯდომარისა და სამუშაო ჯგუფი ხელმძღვანელის, ანრი ოხანაშვილის განცხადებით, სხდომაზე 30-ზე მეტი საკითხის იდენტიფიცირება მოხდა და მათზე მსჯელობა მომდევნო შეხვედრაზე დაიწყება, რომელიც 25 აგვისტოს გაიმართება.

 

„ჩვენ ყველას მივეცით შესაძლებლობა გამოეთქვა აზრი, რაში ხედავენ ისინი გამოწვევას და როგორია მათი ხედვა ამ საკითხის გადაჭრის. ჩვენ შევადგინოთ გარკვეული საკითხების ნუსხა, სადაც კონკრეტული პირები სვამენ, მაგალითად, საკითხს: სასამართლოს გადატვირთულობასთან დაკავშირებით, მოსამართლეთა რაოდენობის გაზრდასთან დაკავშირებით, საპროცესო ვადების დაცვასთან დაკავშირებით, იუსტიციის უმაღლესი საბჭოს მიერ გადაწყვეტილებების მიღების გადახედვასთან დაკავშირებით, უზენაესი სასამართლოს მოსამართლეთა პარლამენტის მიერ არჩევის კვორუმის გადახედვასთან დაკავშირებით და დისციპლინურ საკითხებთან დაკავშირებით. დღეს 30 საკითხზე მეტი გამოიკვეთა და რამდენად არის ეს საკითხები პრობლემა, ამას ჭირდება დასაბუთება, ახსნა და მტკიცებულებებით გამყარება. ამიტომ, ჩვენ ავიღეთ ერთკვირიანი გონივრული ვადა, რათა ყველამ შეძლოს მათ მიერ დაყენებული საკითხების დასაბუთების წარმოდგენა. ჩვენ, ამას ყველაფერს, შევაგროვებთ და 15 აგვისტოს, შემდეგ შეხვედრაზე, უკვე დეტალურად მოვუსმენთ თითოეული საკითხის ავტორს“, - აღნიშნა ანრი ოხანაშვილმა.

 

სამუშაო ჯგუფის წევრები არიან: ფრაქცია „ქართულ ოცნებისა“ და საპარლამენტო ოპოზიციის, ასევე, იუსტიციის უმაღლესი საბჭოს, უზენაესი სასამართლოს, იუსტიციის სამინისტროს, პროკურატურის, ადვოკატთა ასოციაციის, მედიატორთა ასოციაციის, ბიზნეს ასოციაციის, იურიდიული დახმარების სამსახურის, სახალხო დამცველის და სამოქალაქო საზოგადოების (აღმოსავლეთ პარტნიორობის სამოქალაქო საზოგადოების ფორუმის საქართველოს ეროვნული პლატფორმის) წარმომადგენლები.

 

საპარლამენტო ოპოზიციიდან სამუშაო ჯგუფების საქმიანობაში მონაწილეობენ: „მოქალაქეების“, „ევროპელი სოციალისტების“ და „გირჩის“ წარმომადგენლები, ასევე, უფრაქციო პარლამენტის წევრები.

 

გეგმის თანახმად, კანონპროექტის ინიცირება უნდა მოხდეს არაუგვიანეს 2022 წლის 21 დეკემბრისა. კანონპროექტი პარლამენტში მეორე მოსმენით მიღებამდე დასკვნისთვის გაეგზავნება ეუთო/ოდირსა და ვენეციის კომისიას.

 

იურიდიულ საკითხთა კომიტეტის სასამართლო რეფორმის სამუშაო ჯგუფი ევროკავშირის წევრობის კანდიდატის სტატუსის საქართველოსთვის მისანიჭებლად განსახორციელებელი შესაბამისი საკანონმდებლო ცვლილებების მომზადების მიზნით შეიქმნა.

 

 

წყარო :  /www.imedinews.ge/

წაკითხულია : 352


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები