ეკონომიკა

საერთაშორისო სავალუტო ფონდის მისიამ საქართველოს ეკონომიკური მაჩვენებლები შეაფასა

04.04.18 21:45


პირველი ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი საერთაშორისო სავალუტო ფონდის მისიის ხელმძღვანელს მერსედეს ვერა – მარტინს და მისიის სხვა წევრებს შეხვდა. მისია საქართველოში „გაფართოებული დაფინანსების მექანიზმის“ პროგრამის მეორე მიმოხილვის ფარგლებშია ჩამოსული.

შეხვედრაზე მხარეებმა დეტალურად განიხილეს პროგრამის მიმდინარეობა, რომელიც 2017 წლიდან მოქმედებს საქართველოსა და საერთაშორისო სავალუტო ფონდს შორის. გარდა ამისა, საუბარი წარიმართა ქვეყნის მაკროეკონომიკურ მაჩვენებლებსა და მიმდინარე სტრუქტურულ და ეკონომიკურ რეფორმებზე.

პირველმა ვიცე-პრემიერმა დიმიტრი ქუმსიშვილმა საერთაშორისო სავალუტო ფონდის მისიის გააცნო პოზიტიური დინამიკა, რომელიც საქართველოს ეკონომიკური ზრდის მიმართულებით აქვს.

მისი თქმით, 2017 წელი საქართველომ 5-პროცენტიანი რეალური ეკონომიკური ზრდით დაასრულა, ხოლო 2018 წლის თებერვალში – 5,5 პროცენტი, ხოლო პირველ ორ თვეში – 4,9 პროცენტი შეადგინა, რაც ძალიან მაღალი მაჩვენებელია. დიმიტრი ქუმსიშვილის განცხადებით, დაფიქსირებული პოზიტიური მაჩვენებლები მთელ რიგ მიმართულებებში პოზიტიური დინამიკით არის გამოწვეული, რომელთა შორისაა — საწარმოთა ბრუნვა, გაზრდილი ექსპორტი, ტურისტების რაოდენობა და ფულადი გზავნილების მაჩვენებელი.

შეხვედრაზე საერთაშორისო სავალუტო ფონდის მისიის წევრებმა დადებითად შეაფასეს საქართველოს ეკონომიკური ზრდის მაჩვენებელი და აღნიშნეს, რომ რეფორმები, რომლებიც ქვეყანაში ხორციელდება, პოზიტიურად მოქმედებს ეკონომიკური აქტივობაზე.

პირველმა ვიცე-პრემიერმა დიმიტრი ქუმსიშვილმა მისიის წევრებს ასევე გააცნო საქართველოს ეკონომიკური ვითარების მიმართ საერთაშორისო სარეიტინგო კომპანია FITCH-ის ბოლო შეფასების შესახებ. კერძოდ, საქართველოს რეიტინგის პერსპექტივა „სტაბილურიდან“ „პოზიტიურით“ შეიცვალა, რაც ძალიან მნიშვნელოვანია ინვესტორებისთვის.

შეხვედრაზე ასევე გამახვილდა ყურადღება რეფორმებზე, მათ შორის, საპენსიო რეფორმაზე, კაპიტალის ბაზრის განვითარებაზე, საჯარო-კერძო თანამშრომლობის კანონპროექტზე, ენერგეტიკულ და სხვა მნიშვნელოვან რეფორმებზე. ასევე განხილული იქნა საქართველოს ეკონომიკის სექტორებში მიმდინარე ტენდენციები და დაგეგმილი ღონისძიებები, რომლებიც მათი განვითარებისკენაა მიმართული.




წყარო : /www./news.ge/

წაკითხულია : 199


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები