პოლიტიკა

ამირან გამყრელიძე პოლიტიკოსებს მოუწოდებს, საკუთარ საარჩევნო ბილბორდებზე გააკეთონ სლოგანები, რომ ყველა უნდა აიცრას

03.09.21 15:40


დაავადებათა კონტროლის ეროვნული ცენტრის დირექტორი ამირან გამყრელიძე პოლიტიკოსებს მოუწოდებს, საკუთარ საარჩევნო ბილბორდებზე გააკეთონ სლოგანები შინაარსით, რომ ყველა უნდა აიცრას.

 

როგორც მედია-ვებინარზე გამყრელიძემ განაცხადა, თბილისში ვაქცინაციისკენ მოწოდებით ბილბორდები არის, თუმცა არასაკმარისი რაოდენობით.

 

„მე ბევრჯერ მოვუწოდე ყველა პარტიის, როგორ მმართველი ისე ოპოზიციური პარტიების პოლიტიკოსებს და ახლაც მოვუწოდებ, რომ წინასაარჩევნო კამპანიაში ერთი თვის განმავლობაში შინაარსობრივად მთავარი სლოგანი იყოს ის, რომ ყველა უნდა ავიცრათ, რომ აცრა გადაარჩენს ათასობით ადამიანის სიცოცხლეს და აცრაზე გადის ქვეყნის განვითარების და თავისუფლების მთავარი გზა. დღეს აცრა არის მთავარი პრიორიტეტი ქვეყანაში. ჩემზე რომ იყოს დამოკიდებული, ყველა ადამიანის ბანერს მივაწერდი, რომ ერთად წავიდეთ და ავიცრათ. ყველა ამ ადამიანს, რომელიც ბანერზეა, ვთხოვდი, რომ ერთ-ერთ ბანერზე საკუთარი აცრის სურათი დადონ და ხალხს აჩვენონ, რომ დღეს მთავარი არის აცრა.

 

ჩვენ რომ ვიოცნებოთ, რომ ერთ თვეში არა ერთი, არამედ 2 მლნ აცრა ჩავატაროთ, ამისთვის საჭიროა ყოველდღიურად ჩავატაროთ დაახლოებით 50-60 ათასი აცრა. ეს შესაძლებელია. სექტემბერში რომ ეს გავაკეთოთ, ოქტომბერში გვექნება ბევრად მშვიდი სიტუაცია. შესაძლებელია ამის გაკეთება, თუ გავერთიანდებით. ეს უნდა იყოს მთავარი მიზანი“,- განაცხადა გამყრელიძემ.

 

ამასთან, გამყრელიძემ ისაუბრა ინიციატივაზე, რომ პოლიტიკოსებმა საარჩევნო შეხვედრებზე ერთი ექიმი წაიყვანონ და განაცხადა, რომ ეს საკითხი საკოორდინაციო საბჭოზეც დააყენა და პოლიტიკოსებს მოუწოდა, რომ შეხვედრები დაიწყონ აცრისკენ მოწოდებით.

 

„ბევრ ადგილზე დავაყენე ეს საკითხი, საკოორდინაციო საბჭოზეც ვთქვი და მოვუწოდე პოლიტიკოსებს: შეხვედრებზე ატარეთ ექიმები ან ექიმებისგან ისწავლეთ მთავარი გზავნილები და თქვენი შეხვედრები დაიწყეთ აცრებზე გზავნილებით“ ,- განაცხადა გამყრელიძემ.

 

 

 

 

წყარო  :  IPN /www.interpressnews.ge/

წაკითხულია : 118


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები