ეკონომიკა

საქართველოს ეკონომიკა კვლავ იზრდება

01.05.17 19:50


საქართველოში რეალურმა ეკონომიკურმა ზრდამ 2017 წლის პირველ კვარტალში, 2016 წლის ანალოგიურ პერიოდთან შედარებით, 5% შეადგინა, აღნიშნულია „საქსტატის" მასალებში.

საქართველოში რეალურმა ეკონომიკურმა ზრდამ 2017 წლის მარტში, 2016 წლის ანალოგიურ პერიოდთან შედარებით, 5,3% შეადგინა. საქართველოში რეალურმა ეკონომიკურმა ზრდამ 2017 წლის იანვარში შეადგინა 5,2%, ხოლო თებერვალში — 4,4%.

მიუხედავად იანვარსა და თებერვალში ეკონომიკური ზრდისა, ქვეყნის ეკონომიკის პოტენციური დონიდან გადახრა უარყოფითი რჩევა, აღნიშნულია საქართველოს ეროვნული ბანკის მასალებში.

აქედან გამომდინარე, ეროვნულ ბანკში მიაჩნიათ, რომ შიდა მოთხოვნა ჯერ კიდევ სუსტია მიუხედავად იმისა, რომ ის კრედიტირების ზრდის ტემპებით არის მხარდაჭერილი. საგარეო მოთხოვნის გაზრდასთან დაკავშირებით, 2017 წლის დასაწყისში საქონლის ექსპორტი იზრდება, ასევე იზრდება შემოსავლები ტურიზმიდან. გარდა ამისა, გასულ წელთან შედარებით, მნიშვნელოვნად გაიზარდა ფულადი გადარიცხვები, თუმცა, ეს მაჩვენებელი 2014 წლის დონესთან შედარებით მაინც დაბალია. მიუხედავად იმისა, რომ გარე ბაზრებზე ვითარების გაუმჯობესებამ ლარის გაცვლით კურსზე ზეწოლა შეამცირა, ინფლაციის პროგნოზული ზრდიდან გამომდინარე, ეროვნულმა ბანკმა მარტში მონეტარული პოლიტიკის გამკაცრების გადაწყვეტილება მიიღო და რეფინანსირების განაკვეთი 6,75%-მდე გაზარდა.

მიმდინარე წელს საქართველოში ეკონომიკური ზრდა 4%-ზეა დაგეგმილი. EBRD-ის პროგნოზით, ეკონომიკური ზრდა საქართველოში 2017 წელს 3,9%-ს მიაღწევს, რასაც ხელს შეუწყობს ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმება (DCFTA).

საერთაშორისო სავალუტო ფონდის მისიამ, თავის მხრივ, საქართველოში ვიზიტის შედეგების შემაჯამებელ ანგარიშში აღნიშნა, რომ ეკონომიკური ზრდა საქართველოში მთავრობის მიერ შეთავაზებული რეფორმების პროგრამის წარმატებული განხორციელების შემთხვევაშია შესაძლებელი. სტრუქტურული რეფორმების განხორციელება კერძო ინვესტიციების, შრომის ნაყოფიერების ზრდისთვის და ექსპორტის კონკურენტუნარიანობის ამაღლებისთვის ხელსაყრელ პირობებს შექმნის.

საერთაშორისო სავალუტო ფონდის პროგნოზებით, საქართველოს ეკონომიკური ზრდის მაჩვენებელი 2017 წელს 4,5%-ს შეადგენს, 2018 წელს კი 5%-მდე გაიზრდება. მსოფლიო ბანკის პროგნოზებით, საქართველოში 2017-2018 წლებში აღმოსავლეთ ევროპისა და ცენტრალური აზიის 21 ქვეყანას შორის ეკონომიკური ზრდის ერთ-ერთი ყველაზე მაღალი მაჩვენებელი დაფიქსირდება. 2015 წელთან შედარებით 2016 წელს რეალურმა ეკონომიკურმა ზრდამ საქართველოში 2,2% შეადგინა.



წყარო : Sputnik საქართველო /www.sputnik-georgia.com/

წაკითხულია : 172


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები