საზოგადოება

სასამართლომ ყოფილი მეუღლის მკვლელობაში ბრალდებულ ქალს 10 წლით თავისუფლების აღკვეთა მიუსაჯა

02.08.16 20:35


საქალაქო სასამართლომ ყოფილი მეუღლის განზრახ მკვლელობისთვის ბრალდებული მარინა დ. დამნაშავედ სცნო, ამის შესახებ პროკურატურის მიერ გავრცელებულ განცხადებაშია აღნიშნული.

თბილისის საქალაქო სასამართლომ სრულად გაიზიარა ბრალდების მხარის მიერ წარდგენილი მტკიცებულებები და ყოფილი მეუღლის განზრახ მკვლელობისთვის ბრალდებული მარინა დუდაევა დამნაშავედ სცნო საქართველოს სსკ–ის 111, 108-ე მუხლით.

სასამართლო პროცესზე გამოკვლეული მტკიცებულებებით დადასტურდა, რომ 2007 წლიდან – 2010 წლამდე პერიოდში მარინა დუდაევა არარეგისტრირებულ ქორწინებაში იმყოფებოდა არჩილ ბ-სთან. მიმდინარე წლის 7 იანვარს, მარინა დუდაევა და არჩილ ბ. ერთმანეთს ქ.თბილისში, ქინძმარაულის ქუჩის მიმდებარედ არსებულ ამ უკანასკნელის საცხოვრებელ სახლში შეხვდნენ, სადაც მიიღეს ალკოჰოლური სასმელი, რის შემდეგაც დაახლოებით 21:00 საათზე სტუმრად მათ ახლობელს ზურაბ ხ-ს ეწვივნენ. სტუმრად ყოფნისას არჩილ ბ. მარინა დ-ს მობილურ ტელეფონში არსებულ ინფორმაციას ათვალიერებდა, რამაც ამ უკანასკნელის განაწყენება გამოიწვია. აღნიშნული მიზეზით წარმოქმნილი კონფლიქტის დროს, მარინა დ-მ ყოფილ მეუღლეს, შურისძიების მოტივით, განზრახ მოკვლის მიზნით, გულმკერდის არეში დანით ორჯერ მიაყენა ჭრილობა. არჩილ ბ. მიღებული ჭრილობების შედეგად ადგილზე გარდაიცვალა.

სამართალდამცველებმა მარინა დ. 2016 წლის 8 იანვარს, მომხდარი ფაქტიდან რამდენიმე საათში დააკავეს.

თბილისის საქალაქო სასამართლოს სისხლის სამართლის საქმეთა კოლეგიამ მარინა დ. დამნაშავედ სცნო საქართველოს სისხლის სამართლის კოდექსის 111, 108-ე მუხლით გათვალისწინებული დანაშაულის ჩადენისათვის და სასჯელის სახედ და ზომად განუსაზღვრა 10 წლით თავისუფლების აღკვეთა”, – ნათქვამია განცხადებაში.


წყარო : /www.kvira.ge/

წაკითხულია : 694


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები