საზოგადოება

დავით ნარმანია ბარნოვის და მცხეთის ქუჩებზე მიმდინარე საგზაო სამუშაოებს გაეცნო

29.08.16 21:10


თბილისის მერი დავით ნარმანია ვიცე-მერ ლაშა აბაშიძესთან, ვაკის რაიონის გამგებელთან, ნოდარ ტურძელაძესთან და კეთილმოწყობის სამსახურის წარმომადგენლებთან ერთად ვაკეში, ბარნოვისა და მცხეთის ქუჩებზე მიმდინარე გზის კაპიტალური შეკეთების სამუშაოებს გაეცნო.

“ბარნოვის და მცხეთის ქუჩებზე მიმდინარეობს მნიშვნელოვანი კაპიტალური სამუშაოები: იცვლება მიწისქვეშა კომუნიკაციები, კეთდება სანიაღვრე სისტემა, ეწყობა ტროტუარები. მთლიანად, თავიდან ბოლომდე იგება გზები. აღნიშნულიდან გამომდინარე, ძალიან ინტენსიური სამუშაოების შედეგად, უახლოესი სამი კვირის განმავლობაში, ვიდრე ქალაქი სრულად დაიტვირთება, ჩვენ ძირითად სამუშაოებს დავასრულებთ და ორი ძალიან მნიშვნელოვანი ახალი პროექტი გვექნება ქალაქში,”- განაცხადა თბილისის მერმა დავით ნარმანიამ.

თბილისის მერიის კეთილმოწყობის საქალაქო სამსახურმა მცხეთის ქუჩაზე სარეაბილიტაციო სამუშაოები 13 აგვისტოს დაიწყო. ამჟამად მიმდინარეობს ბორდიურების მოწყობა, მზადდება ტროტუარები. იცვლება სანიაღვრე სისტემა.

სამუშაოების სპეციფიკიდან გამომდინარე 15 სექტემბრის ჩათვლით მცხეთის ქუჩა გადაკეტილია მრგვალი ბაღიდან ქობულეთის ქუჩამდე, მეორე ეტაპზე კი, 10 სექტემბრიდან 10 ოქტომბრის ჩათვლით გადაიკეტება ქობულეთის ქუჩიდან მცხეთის ქუჩის ბოლომდე.

სარეაბილიტაციო სამუშაოებს თბილისის მერიის კეთილმოწყობის საქალაქო სამსახურის კონტრაქტორი კომპანია შპს „ჰერიო” აწარმოებს. თბილისის მერიის ბიუჯეტიდან აღნიშნული გზის რეაბილიტაციისთვის 767 570,93 ლარია გამოყოფილი.

რაც შეეხება ბარნოვის ქუჩას, ამჟამად მიმდინარეობს ახალი სანიაღვრე ქსელის მოწყობის სამუშაოები ბარნოვი-პეტრიაშვილის კვეთიდან მრგვალ ბაღამდე. ასევე, ეწყობა ახალი ბაზალტის ბორდიურები. სამუშაოების ფარგლებში დაგეგმილია ახალი სანიაღვრე ქსელის, ტროტუარების, ბორდიურების და სავალი ნაწილის რეაბილიტაცია.

ვასილ ბარნოვის ქუჩის კაპიტალური შეკეთებისთვის თბილისის მერიის ბიუჯეტიდან 1 106 000 ლარი დაიხარჯება. სამუშაოებს შპს “ჯეუ გრუპი“ აწარმოებს.


წყარო : /www.kvira.ge/

წაკითხულია : 325


დატოვეთ კომენტარები

(გთხოვთ, კომენტარებში თავი შეიკავოთ რელიგიური, რასობრივი და ნაციონალური დისკრიმინაციის გამოხატვისაგან, ნუ გამოიყენებთ სალანძღავ და დამამცირებელ გამოთქმებს, ასევე კანონსაწინააღმდეგო მოწოდებებს.)

გამოაქვეყნეთ
დასაშვებია 512 სიმბოლოს შეყვანა

ახალი ამბები